ఆ సినిమాతో డేంజర్ వైరస్ వ్యాపిస్తోంది!

Posted: 06/16/2016 04:43 PM IST

సెన్సార్ బోర్డు దెబ్బకి చిక్కుల్లో ఉడ్తా పంజాబ్ సినిమా అంటూ ఇన్నాళ్లూ వార్తల్లో విని విని ఉన్నాం కదా. ఇక ఇప్పడు ఈ సినిమాతో సాధారణ జనాలకు కూడా చిక్కులొచ్చి పడుతున్నాయి ఏంటంటారా? అక్కడికే వస్తున్నాం. బోర్డు వర్సెస్ బాలీవుడ్ గా మారిన ఉడ్తా పంజాబ్ వ్యవహారం బుధవారం మరో కొత్త మలుపు తీసుకున్న విషయం తెలిసిందే. ఆన్ లైన్ లో ఎవరో ఈ చిత్రాన్ని లీక్ చేసి పడేశారు. అలర్టయిన నిర్మాతలు వెంటనే స్పందించి ఆన్ లైన్ నుంచి చిత్రాన్ని తొలగించే చర్యలు చేపట్టినప్పటికీ, అప్పటికే డౌన్ లోడ్ చేసుకున్న వారు మళ్లీ మళ్లీ అప్ లోడ్ చేస్తున్నారు.

ఈ అప్ లోడ్ లింకులతో అత్యంత ప్రమాదకర వైరస్ కూడా వ్యాపిస్తోందని వార్తలు వినిపిస్తున్నాయి. సినిమాను గనక స్మార్ట్ ఫోన్ లో చూడాలనుకుంటే మాత్రం ఆ వైరస్ దెబ్బకి ఫోన్ లోని డేటా మొత్తం సమాచారం తుడిచిపెట్టుకు పోతోందని హెచ్చరిస్తున్నారు. అయితే డౌన్ లోడ్ ఆపేందుకే చిత్ర యూనిట్ ఈ రకమైన ప్రచారానికి దిగిందని మరోవాదన వినిపిస్తోంది. ఏదేమైనా ఇప్పటికే విడుదలైన ఈ లీకుల ద్వారా చిత్రానికి పాజిటివ్ టాక్ రావటంతో మరింత ఫ్రీ పబ్లిసిటీ దొరికినట్లయ్యింది. ఇప్పటికే పైరసీని వ్యతిరేకిస్తూ చిత్రయూనిట్ తో పాటు, అమీర్ ఖాన్, కరణ్ జోహార్ లాంటి పలువురు చిత్రాన్ని థియేటర్లలోనే చూడాలని విజ్ణప్తి చేస్తున్నారు.

భాస్కర్