ఆటోనగర్ సూర్య రాబోతుంది

Posted: 08/26/2013 12:35 PM IST

వెన్నెల, ప్రస్థానం, లాంటి సినిమాలకు దర్శకత్వం వహించి తనకంటూ ఓ గుర్తింపును తెచ్చుకోవడమే కాకుండా ‘ప్రస్థానం ’ సినిమాకు విమర్శకుల నుండి సైతం ప్రశంసలు అందుకున్న దేవాకట్టా ఎంతో ప్రతిష్టాత్మంగా నాగచైతన్యతో ‘ఆటోనగర్ సూర్య ‘ సినిమాను సగానికి పైగా తెరకెక్కించిన తరువాత ఆర్థిక కారణాల వల్ల ఈ సినిమా అటెకెక్కిన విషయం తెలిసిందే. ఇక ఈ సినిమా మరుగుల పడినట్లేనని అంతా అనుకున్నారు. దేవా కట్టా కూడా వేరే సినిమా కోసం కథను సిద్దం చేసుకున్నాడు. కానీ అనూహ్యంగా ఈ సినిమాను కొనసాగించబోతున్నామని స్వయంగా దేవాకట్టానే ట్వీట్ చేశాడు. దీని పై స్పందిస్తూ... కొన్ని అనివార్య కారణాల వల్ల ఈ సినిమా నిర్మాణం ఆగిపోయింది. కానీ ఇప్పుడు అన్ని అవాంతరాలు తొలిగిపోయాయి.  ఈ సినిమాను త్వరలోనే పట్టాలెక్కించి, మిగిలిన నిర్మాణాన్ని పూర్తి చేసి త్వరలోనే ప్రేక్షకుల ముందుకు తీసుకువస్తాం అని తెలిపాడు. ఈ సినిమా ఆగిపోవడంతో నాగచైతన్యకు కూడా అవకాశాలు అంతగా రావడం లేదు. ప్రస్తుతం తన ఫ్యామిలీ మల్టీ స్టారర్ చిత్రం అయిన ‘మనం ’ లో నటిస్తున్నాడు. త్వరలోనే ఈ సినిమా షూటింగులో పాల్గొననున్నాడు.ఏది ఏమైనా ‘ఆటోనగర్ సూర్య ’ లో కదలిక రావడం చైతూ అభిమానులకు శుభవార్తే అని చెప్పవచ్చు.