Posted: 08/04/2012 05:23 PM IST

ఒకవైపు ఇద్దరుకొడుకులు, కూతురు అనేక ప్రయత్నాలు చేస్తూ... ప్రతి ప్రయత్నంలోనూ ఒక దారుణమైన ఫెయిల్యూర్ ను మూటకట్టుకొంటున్న నేపథ్యంలో పరిస్థితిని చక్కదిద్దాలనుకొంటున్నాడో ఏమో కానీ...కలెక్షన్ కింగ్ మోహన్ బాబు తిరిగి ఫుల్ లెంగ్త్ లో సినిమాల కోసం పనిచేయడానికి సిద్ధం అవుతున్నాడు. కొడుకులు హీరోలుగా కెరీర్ మొదలెట్టినప్పటి నుంచి మోహన్ బాబు హీరోగా అవతారమెత్తుతోంది తక్కవే! మొన్నటి వరకూ 'రావణ' విషయంలో వార్తలు వినిపించగా, ఇప్పుడు మోహన్ బాబు హీరోగా మరో సినిమా అనౌన్స్ అయ్యే అవకాశాలు కనిపిస్తున్నాయి. కామెడీ సినిమా ల దర్శకుడు జి నాగేశ్వర్ రెడ్డి డైరెక్షన్ లో మోహన్ బాబు హీరోగా ఒక సినిమా రానుంది.

ఈ విషయాన్ని మోహన్ బాబు స్వయంగా ప్రకటించారు. ఈ సినిమాలో సునీల్ కూడా ఒక ముఖ్యమైన పాత్ర చేస్తున్నాడు. ఫుల్ లెంగ్త్ ఎంటర్ టైనర్ అయిన ఈ సినిమా గురించి వివరాలను త్వరలోనే ప్రకటించనున్నట్లు మోహన్ బాబు తెలిపారు. తన పిల్లల సినిమాల గురించి మోహన్ బాబు మాట్లాడుతూ... విష్ణు హీరోగా నటిస్తున్న దేనికైనా రెడీ కామెడీ సబ్జెక్ట్ అని, గుండెల్లో గోదారి ఉద్వేగభరిత సినిమా అని చెప్పుకొచ్చారు. ఈ మధ్య కాలంలో ఝుమ్మంది నాదం తర్వాత మరే సినిమాలోనూ మోహన్ బాబు కనిపించలేదు. మరి ఈ రీఎంట్రీ ఆయనకు ఎటువంటి ఫలితాన్ని ఇస్తుందో  చూడాలి.