Posted: 05/28/2012 03:45 PM IST

      మొత్తానికి అధినాయకుడు నోరువిప్పాడు.  జూన్ 1 న విడుదల కానున్న 'అధినాయకుడు' సినిమాలో వై.యస్.జగన్ మోహన్ రెడ్డిని టార్గెట్ చేస్తూ, బాలకృష్ణ కొన్ని డైలాగులు చెప్పినట్టుగా  టాలీవుడ్ లో ప్రచారం జరుగుతోంది.  ఈ నేపథ్యంలో వీటికి బలాన్ని చేకూరుస్తూ హీరో బాలకృష్ణ ఈ రోజు కొన్ని వ్యాఖ్యలు చేశారు. 'అవును... అధినాయకుడు సినిమాలో కొందరిని ఉద్దేశిస్తూ కొన్ని సంభాషణలు వున్న సంగతి వాస్తవమే' అన్నారు బాలకృష్ణ. అంతేకాదు.. ఆర్ధిక నేరాల కేసులో నిన్న అరెస్టయిన జగన్ కు శిక్ష తప్పదని బాలకృష్ణ ఈ సందర్భంగా వ్యాఖ్యానించడం గమనార్హం. జగన్ పై ఎప్పుడూ విమర్శలు కానీ, కామెంట్లు కానీ చేయని బాలకృష్ణ తొలిసారిగా ఇలా వ్యాఖ్యానించడం సంచలనాన్ని రేకెత్తించింది.
      బాలకృష్ణ తొలిసారిగా త్రిప్రావూతాభినయం చేస్తున్న ఈ చిత్రాన్ని పరుచూరి మురళి దర్శకత్వంలో శ్రీకీర్తి కంబైన్స్ పతాకంపై ఎమ్.ఎల్.కుమార్ చౌదరి ఈ చిత్రాన్ని నిర్మిస్తున్నారు. లక్ష్మీరాయ్, సలోని కథానాయికలు. ‘బాలకృష్ణ ఇమేజ్‌ను దృష్టిలో పెట్టుకొని తయారుచేసుకున్న కథాంశమిది. నిరంతరం ప్రజల శ్రేయస్సు కోసం తపించేవాడే సిసలైన అధినాయకుడు అనే అంశాన్ని ఈ చిత్రంలో ఆవిష్కరిస్తున్నాం. బాలకృష్ణ అభిమానుల్ని రంజింపజేసే అంశాలన్నీ ఈ చిత్రంలో వుంటాయి. మూడు విభిన్న పాత్రల్లో బాలకృష్ణ అభినయం ప్రేక్షకుల్ని మంత్రముగ్ధుల్ని చేస్తుంది. యాక్షన్‌తో పాటు చక్కటి సెంటిమెంట్ ప్రేక్షకుల్ని ఆకట్టుకుంటుందని దర్శకుడు వెల్లడిస్తున్నాడు.
జయసుధ, కోట శ్రీనివాసరావు, చరణ్‌రాజ్, బ్రహ్మానందం, ఎమ్మెస్‌నారాయణ, వేణుమాధవ్ తదితరులు నటించిన ఈ చిత్రానికి కెమెరా: సురేందర్ రెడ్డి, సంగీతం: కల్యాణిమాలిక్, సమర్పణ: సందీప్. అష్టకష్టాలకోర్చి వచ్చేనెల మొదటి రోజు విడుదలౌతోన్న ఈ సినిమా బాలయ్య బాబు తాజా వ్యాఖ్యలతో ఇంకెలాంటి కంపనలు పుట్టిస్తుందో చూడాలి. 

...avnk