Posted: 05/22/2012 12:50 PM IST

       అధినాయకుడు బాలారిష్టాలు దాటి మొత్తం మీద తెరపైకి వచ్చేందుకు సమాయత్తమవుతున్నాడు. ఆర్ధిక పరమైన ఇబ్బందుల నుంచి బైటపడిన 'అధినాయకుడు' ఈ నెల 31 న ప్రేక్షకుల ముందుకి రానున్నాడు. బాలకృష్ణ త్రిపాత్రాభినయం చేసిన ఈ సినిమాలో జయసుధ, లక్ష్మీరాయ్, సలోని కథానాయికలుగా కనిపించనున్నారు. పరుచూరి మురళి దర్శకత్వంలో ఎం.ఎల్.కుమార్ చౌదరి భారీ బడ్జెట్ తో ఈ సినిమాని నిర్మించారు. అయితే అనుకోకుండా బడ్జెట్  పెరిగిపోవడంతో, నిర్మాత ఆర్ధిక పరమైన ఇబ్బందుల్లో పడ్డారు. ఫలితంగా ఈ సినిమా విడుదల వాయిదా పడుతూ అభిమానుల సహనాన్ని పరీక్షించింది. అయితే,  తాజాగా అందిన సమాచారం ప్రకారం, దాసరి నారాయణరావు జోక్యంతో ఈ సినిమా ఆర్ధిక పరమైన సమస్యల నుంచి  బైటపడిందని తెలుస్తోంది. అనుకోకుండా జరిగిన ఆలస్యం ఈ సినిమా పై ప్రభావం చూపే అవకాశముందనీ, ఒకవేళ సినిమా బాగుంటే ఆ ఎఫ్ఫెక్ట్  అంతగా ఉండక పోవచ్చని పరిశీలకులు అభిప్రాయపడుతున్నారు. ఈ సినిమా చిత్ర నిర్మాతను కష్టాల కడలినుంచి బయటపడేస్తుందో లేదో చూడాలి.

..avnk