ప్రచారంలో మోదీ టీ, మానిఫెస్టోలో 5 టీలు

Posted: 04/07/2014 12:24 PM IST

మోదీ టీ దుకాణాలతో ఎన్నికల ప్రచారం చేసిన భాజపా ఎన్నికల మేనిఫెస్టోలో ఏకంగా 5 టీలను ప్రముఖంగా పరిగణనలోకి తీసుకుంది.  అవి, టాలెంట్, టూరిజం, ట్రేడ్, ట్రెడిషన్, టెక్నాలజీ.

ఈ విషయాన్ని మీడియాకు వెల్లడి చేసిన భాజపా ఎన్నికల మేనిఫెస్టో కమిటీ సంధానకర్త మురళీ మనోహర్ జోషి, మేనిఫెస్టోలో మహిళా శక్తి, విద్య, ఉపాధి కల్పనలు కూడా మేనిఫెస్టోలో ప్రధానంగా చోటుచేసుకున్నాయని అన్నారు. 

టాలెంట్ లో ప్రతిభను గుర్తించి సరైన అవకాశం ఇవ్వటం జరుగుతుంది.  టూరిజం అభివృద్ధి వలన జాతీయాదాయం పెరుగుతుంది.  ట్రేడ్- వ్యాపారాభివృద్ధి దేశానికి ఎలాగూ మంచిదే.  అది సరైన ప్రమాణంలో లేనప్పుడు ప్రభుత్వ ఖర్చు భారమంతా ప్రజల మీద పన్నుల రూపంలో పడుతుంది. 

ట్రెడిషన్ లో సంస్కృతి, సాంప్రదాయాల పరిరక్షణ ఉంటుంది.  ఇందులో భాగంగా రామ్ జన్మ భూమి ప్రణాళికలో అయోధ్యలో రామ మందిరం పునర్నిర్మాణ కార్యక్రమ సాధ్యాసాధ్యాలను పరిశీలించటం జరుగుతుంది.  విశ్వవ్యాప్తంగా టెక్నాలజీ పెరుగుతున్న కాలంలో మనదేశంలో కూడా సాంకేతికాభివృద్ధి చేస్తూ దేశం వెనకబడిపోకుండా చూడటం కూడా అవసరమే. 

అందుకే ఆ 5 టి లను భాజపా మేనిఫెస్టోలో చేర్చటం జరిగింది.

-శ్రీజ