బాబు రహస్య ఒప్పందం!

Posted: 02/07/2015 07:28 PM IST

ఆంధ్రప్రదేశ్ రాష్ట్రానికి కేంద్రప్రభుత్వం స్పెషల్ ప్యాకేజీ కల్పించకపోవడంపై తీవ్ర విమర్శలు వెల్లువెత్తిన విషయం తెలిసిందే! నిన్నమొన్నటివరకు ఆ ప్యాకేజీ మీద అంతా ఆధారపడి వుండగా.. కేంద్రం దాన్ని తిరస్కరించిన నేపథ్యంలో నిరాశ వ్యక్తం చేశారు. దీంతో ఏపీ సీఎం చంద్రబాబు నాయుడు ఈ విషయంపై చర్చించేందుకు కేంద్రమంత్రి అరుణ్ జైట్లీతో మంతనాలు జరిపారు. అయితే.. వారిమధ్య జరిగిన ఆ సంభాషణల విషయాలేంటో అంతగా బయటికి రాలేదు.

కొందరు ప్యాకేజీ ఇచ్చే అవకాశాలు వున్నాయంటే.. మరికొందరు అసలు ఆ ప్యాకేజీయే లేకుండా బాబు వారితో రహస్య ఒప్పందాలు కుదుర్చుకున్నారంటూ ఆరోపణలు చేస్తున్నారు. ఈ నేపథ్యంలోనే దళిత మహాసభ వ్యవస్థాపక ప్రధాన కార్యదర్శి కత్తి పద్మారావు సీఎం బాబుపై ధ్వజమెత్తారు. పొన్నూరులో మీడియాతో మాట్లాడిన ఆయన.. బాబుపై ఆగ్రహం వ్యక్తం చేశారు. రాష్ట్రానికి ప్రత్యేక ప్యాకేజీ లేకుండా బాబు బీజేపీవారితో రహస్య ఒప్పందాలు కుదుర్చుకున్నారని ఆరోపించారు. ఇందులో భాగంగానే ఆయన మాట్లాడుతూ..

* ముఖ్యమంత్రి చంద్రబాబు నవ్యాంధ్రతో దోబూచలాడుతున్నారని విమర్శించారు.
* అప్పట్లో ఎన్టీఆర్ ఢిల్లీలో నిధులకోసం డిమాండ్ చేస్తే.. అందుకు వ్యతిరేకంగా బాబు నేడు నిధులకోసం పాకులాడుతున్నారని ఎద్దేవా చేశారు.
* అసలు రాష్ట్రానికి ప్రత్యేక ప్యాకేజీ రాకుండా ఆయన బీజేపీ పార్టీతో రహస్య ఒప్పందం కుదుర్చుకున్నారని ఆరోపించారు.
* రాష్ట్రంలో విద్యుద్ ఛార్జీలు పెంచితే ఉద్యమం చేపడతామని హెచ్చరించారు.