బాబు అలా మాట్లాటం తప్పు ..

Posted: 11/04/2013 01:06 PM IST

Tdp criticism on gom meet is not correct digvijay

రాష్ట్ర వ్యవహారాల ఇంఛార్జ్ దిగ్విజయ్ సింగ్ తెలంగాణ విభజన పై సూచనలు సలహాలు ఇవ్వాలని రాష్ట్రంలోని అన్ని పార్టీలకు లేఖలు పంపి ఈనెల 5వ తేదీలోపు సమాధానం ఇవ్వాలని చెప్పిన విషయం తెలిసిందే. దీనికి మరొక రోజే గడువు ఉండటంతో ఈ విషయం పై ఢిల్లీలో దిగ్విజయ్ సింగ్ మీడియాతో మాట్లాడుతూ... రేపటి లోగా అన్ని పార్టీలు సమాధానాలు ఇవ్వాలని, తెలంగాణ పై అన్ని పార్టీలతో చర్చించాకే నిర్ణయం తీసుకున్నామని,

తీరా నిర్ణయం తీసుకున్న తరువాత ఇప్పుడు దాన్ని వ్యతిరేకించడం కరెక్ట్ కాదని, మంత్రుల బ్రుందానికి (జీవోఎం) విధించిన విధి విధానాలపై ఎవరు ఏమి చెప్పదలుకున్నారో అది సూటిగా చెప్పవచ్చని, కాంగ్రెస్ పార్టీ ఆంటోని కమిటీని నియమించినప్పుడు తెలుగుదేశం పార్టీ ఒక ప్రకటన చేస్తూ, కాంగ్రెస్ పార్టీ పరంగా కమిటీ వేస్తారా? అదికారిక కమిటీ వేయకుండా అని ప్రశ్నించిందని దిగ్విజయ్ సింగ్ అన్నారు. ఇప్పుడు అధికారిక కమిటీని వేస్తే మరో మాట చెబుతోందని, తీరా అఖిల పక్ష భేటీల తేదీని ప్రకటించిన తరువాత జీవోఎం విధించిన విధి విధానాలపై తాము లేఖ ఇవ్వకూడదని తెలుగుదేశం పార్టీ అనడం సరికాదని దిగ్విజయ్ సింగ్ అన్నారు. టీఆర్ఎస్ అధ్యక్షుడు కేసీఆర్ తాను చెప్పదలచుకున్నది ఏదైనా ఉంటే జీవోఎంకు చెప్పుకోవచ్చని, అనవసరమైన వ్యాఖ్యలు చేసి ప్రజల్ని రెచ్చగొట్టవద్దని ఆయన కేసీఆర్ కి సూచించారు. రాష్ట్ర కాంగ్రెస్ పార్టీ కూడా జీవోఎంకు నివేదిక ఇస్తుందన్నారు.

సీమాంధ్ర, తెలంగాణ ప్రజల మధ్య ఉన్న అగాధాన్ని తగ్గించే బాధ్యత కాంగ్రెస్పై ఉందన్నారు. తెలంగాణ సమస్య పరిష్కారానికి కేంద్రం పూర్తి ప్రజాస్వామ్యయుతంగా వ్యవహరిస్తోందని అన్నారు. మంత్రుల కమిటీ పై తెదేపా విమర్శలు చేయడం సరికాదన్నారు. తెలంగాణ సమస్య పరిష్కారంతో పాటు సీమాంద్ర ప్రజల సమస్యలను తీర్చడానికే కేంద్రం కట్టుబడి ఉందని దిగ్గీరాజా మరోసారి స్పష్టం చేశారు.

మరో వైపు టీడీపీ అధినేత కేంద్రం తీరు వ్యతిరేకిస్తూ ప్రధానమంత్రి మన్మోహన్ సింగ్కు లేఖ రాయనున్నట్లు సమాచారం. జీవోఎంను పరిగణనలోకి తీసుకోవటం లేదని, కేంద్రం నియమించిన మంత్రుల కమిటీకి నివేదిక ఇవ్వడంలేదని ఆయన తన లేఖలో పేర్కొననున్నట్లు సమాచారం. ప్రధాన మంత్రికి లేఖ రాయనున్న నేపథ్యంలో ఇటు సీమాంధ్ర నేతలతో, అటు తెలంగాణ నేతలతో సమావేశం నిర్వహించి విస్తృతంగా చర్చిస్తున్నట్లు సమాచారం. ఈ భేటీల తరువాత అఖిల పక్షభేటికి వెళ్ళాలా ? వద్దా అనేదాని పై కూడా స్పష్టమైన ప్రకటన చేసే అవకాశం ఉన్నట్లు తెలుస్తుంది.