కేసీఆర్ ని పదిరోజుల్లో చంపేస్తారట

Posted: 08/13/2013 12:35 PM IST

K chandrasekhar rao receives threatening letter

తెలంగాణ ఉద్యమాన్ని దాదాపు పదమూడు సంవత్సరాల నుండి నడుపుతున్న తెలంగాణ రాష్ట్ర సమితి అధ్యక్షుడు, మహబూబ్ నగర్ పార్లమెంటు సభ్యుడు కల్వకుంట్ల చంద్రశేఖర రావును చంపేస్తామంటూ బెదిరింపు లేఖ పార్టీ కార్యాలయానికి వచ్చింది. ఆంధ్రా నక్సల్స్ పేరిట ఈ లేఖ సోమవారం వచ్చినట్లు పార్టీ వర్గాలు తెలిపాయి. ఈ లేఖను ఎవరు ఎక్కడి నుండి పంపించారో వివరాలు మాత్రం రాయలేదు. ఎర్ర స్కెచ్ పెన్నుతో రాసిన లేఖలో కాల్చి చంపేస్తామంటూ పేర్కొన్నారు. ‘ కేసీఆర్.. యూ విల్ బి షాట్‌ డెడ్ విత్ ఇన్ 10 డేస్ ’ అంటూ అందులో రాసి ఉంది. ఇప్పటికే కెసిఆర్‌కు బెదిరింపు కాల్స్ వస్తున్నాయని ఇటీవల తెరాస నేతలు చెప్పిన విషయం తెలిసిందే. దీంతో ఆయనకు సెక్యూరిటీని పెంచారు.

కెసిఆర్‌ను చంపేస్తామంటూ బెదిరింపు లేఖ వచ్చిన నేపథ్యంలో తెలంగాణ రాష్ట్ర సమితి శాసన సభా పక్ష నేత ఈటెల రాజేందర్, ఇతర ఎమ్మెల్యేలు మంగళవారం రోజు డిజిపి దినేష్ రెడ్డిని కలిసి ఫిర్యాదు చేయనున్నారని తెలుస్తోంది. ఎవరైనా ఇలాంటి అకృత్యాలకు పాల్పడితే అంతకంటే ఘోరం ఉండదు. ప్రజాస్వామ్యంలో నాయకులను హత్య చేయడం అంటే ప్రజాస్వామ్యాన్ని హత్య చేసుకోవడమే. అయితే తెలంగాణ వాదులు మాత్రం సీమాంధ్ర పాంత్రానికి చెందిన వారే ఈ లేఖ పంపించి ఉంటారని అనుమానం వ్యక్తం చేస్తున్నారు. ఈ లేఖ గురించి పోలీసులు పూర్తి విచారణ జరిపి అందులో నిజానిజాలను వెలికి తీసి , నిందితులను కఠినంగా శిక్షించవలసి ఉంది.