తారలు దిగివస్తున్న మాసం సెప్టెంబర్?

Posted: 08/06/2013 04:24 PM IST

వచ్చే నెలలో సినీ ప్రేమికులకు కన్నుల పండుగేనని, అభిమాన తారలు వెండి తెరను అలంకరించి వేడుక చేయబోతున్నారని వారి వారి అభిమానులంతా చాలా ముచ్చట పడుతున్నారు.  ఈ వారంలో విడుదల కావలసిన పవన్ కళ్యాణ్ అత్తారింటికి దారేది, రామ్ చరణ్ ఎవడు కూడా సెప్టెంబర్లోనే విడుదల కావొచ్చని సమాచారం. 

అవి కాకుండా మామూలుగానే సెప్టెంబర్ నెలలో విడుదలకు సిద్ధమౌతున్న సినిమాలు ఉండనే ఉన్నాయి.  అవి జూనియర్ ఎన్టీఆర్ రామయ్య వస్తావయ్య, నాగార్జున భాయ్, రామ్ చరణ్ తుఫాన్ జంజీర్ లు, వెంకటేష్ రామ్ ల చిత్రం గోల్ మాల్ లు. 

అయితే ఇవన్నీ ఒకే నెలలో విడుదలైతే తారలు దిగిరావటమేమో కానీ చుక్కలు కనిపిస్తాయంటున్నారు నిర్మాతలు.  నిర్మాణానికి, విడుదలకూ సమయం పడితే ఖర్చు కూడా అలాగే పెరుగుతుంది కాబట్టి నిర్మాణాన్ని అనుకున్న కాలంలో ప్రణాళిక ప్రకారం పూర్తి చేసి సాధ్యమైనంత త్వరగా విడుదల చేస్తేనే నిర్మాతలకు లాభం.  కానీ ఇలా అగ్రతారల చిత్రాలు పొటీ పడితే థియేటర్లకు కొదవు, జేబుకి చిల్లు ఖాయం కాబట్టి అన్ని అగ్రనాయకుల సినాలు సినిమాలనూ ఒకేసారి కాకుండా జాగ్రత్తగా ఒక ఒడంబడికకు వచ్చి అందరి ప్రయోజనాన్నీ ఆలోచించి విడుదల చెయ్యాలి కాబట్టి వీటి విడుదల తేదీలన్నీ తారుమారయ్యే పరిస్థితి కనిపిస్తోంది. 

దీనితో పాటు రాజకీయ వాతావరణం కూడా, ఈ సంవత్సరం పడ్డ వర్షాలు, తుఫాన్లు, అల్పపీడనాలలాగానే ఎప్పడు ఎలాంటి పరిస్థితులను కల్పిస్తాయో ఊహించనలవి కాకుండా ఉంది.  అందువలన, అభిమానుల ఆశలమీద నీళ్ళు చల్లటం కాదు కానీ, అందరికీ అనుకూలమైన వినోదమైన సినిమాల విషయంలో ఏమీ చెప్పలేకుండా ఉంది.  ఇది ఇలాగే కొనసాగితే కొత్త సినిమా నిర్మాణాల విషయంలో కూడా నిర్మాతలు వెనకంజవేసే అవకాశముందని సినీ పరిశ్రమలో భయపడుతున్న విషయం.  వేలాది మంది నటీనటులు, సాంకేతిక నిపుణులు, పంపణీదారులు ఆధారపడ్డ సినిమా పరిశ్రమలో పరిస్థితులను చూసి ఆదుర్దా పడటం సహజమే కదా

-శ్రీజ