డాన్స్ లతో అదరగొట్టిన అన్నయ్య

Posted: 04/14/2013 12:17 PM IST

సినిమాలకు స్వస్తి చెప్పి, రాజకీయాలలో బిజీ అయిన కేంద్ర పర్యాటక శాఖ మంత్రి మెగాస్టార్ చిరంజీవి డాన్సులు చూసి చాలా కాలం అయింది. అప్పుడెప్పుడో తన కొడుకు మగథీర సినిమాలో ఒకటి రెండు స్టెప్పులు వేసి ఆ తరువాత డాన్సులు వేయని చిరు తాజాగా తనదైన శైలిలో డాన్సు వేసి అందర్ని అలరించడమే కాకుండా తనలో ఇంకా ఆ జోష్ తగ్గలేదని నిరూపించాడు. కేంద్ర పర్యాటక శాఖ మంత్రిగా బాధ్యతలు స్వీకరించిన తరువాత తొలిసారిగా రాజధానిలో జరుగుతున్న ప్రపంచ పర్యాటక సదస్సు ఈనెల 12 నుండి ప్రారంభం అయింది. ఈ సదస్సుకు విచ్చేసిన వివిధ దేశాల డెలిగేట్ల కోసం శిల్పకళా వేదికలో ప్రత్యేక విందు ఏర్పాటు చేశారు. ఈ విందులో చిరంజీవి చిందేశారు. ఈ విందులో ఏర్పాటు చేసిన వినోద కార్యక్రమాలలో వివిధ ప్రాంతాల నుండి వచ్చిన విద్యార్థులు తమ తమ కళలలను ప్రదర్శించి విదేశీ ప్రతినిధుల బృందాన్ని అలరించారు. ఈ కార్యక్రమంలో శాస్త్రీయ నృత్యం, చిందు యక్షణ గానం, తప్పెట గుళ్లు, పులివేషాలు, పగటి వేషాలు, కొమ్ముకొయ్య నాట్యాలు చేస్తున్న సమయంలో చిరంజీవి ఉత్సాహాన్ని ఆపుకోలేక వేదిక పైకి వెళ్లి డప్పు దరువుకు అనుగుణంగా నాట్యం చేశారు. విద్యార్థులతో చిరంజీవి కాసేపు చిందేశారు. చిరంజీవి స్టెప్పులేసి అందర్ని మంత్రముగ్ధుల్ని చేసి అక్కడి వారికే కాకుండా తమ అభిమానుల్లో చాలా కాలం తరువాత జోష్ నింపారు. ఈ స్టెప్పులు చూసిన చిరు ఫ్యాన్స్ ఆయనలో ఏ మాత్రం జోష్ తగ్గలేని తెగ ఆనందపడిపోతున్నారు. తన 150 సినిమా త్వరగా చేయాలని కోరారు. తరువాత  చిరంజీవి మాట్లాడుతూ... యువతీ యువకులు సంప్రదాయ కళలు నేర్చుకొని ప్రతిభ కనబర్చడం అభినందనీయం, హర్షనీయమని చెప్పారు. ఏదేమైనా చిరంజీవి పర్యాటక శాఖకు వన్నె తేవడానికి తనదైన శైలిలో ప్రత్నిస్తున్నాడనటంలో ఎటువంటి సందేహం లేదు.