Posted: 12/04/2012 12:24 PM IST

రాష్ట్ర ముఖ్యమంత్రి కిరణ్ కుమార్ రెడ్డి ఏ క్షణంలో ముఖ్యమంత్రి పీఠాన్ని అధిష్టించాడో కానీ, ఆయనకు ఆ రోజు నుండి ఏ మాత్రం మన శాంతి లేదనే చెప్పాలి. ముఖ్యమంత్రిగా ఇటు పాలన సాగించాలో లేక తన పదవి కాపాడుకోవడానికి నిత్యం తన సొంత వర్గం వారు వేసే ఎత్తులకు పై ఎత్తులు ఆలోచించాలో తెలియక సతమతమౌవుతున్నాడు. ఇక ఎస్సీ ఎస్టీ సబ్ ప్లాన్ కోసం ప్రత్యేకంగా ఏర్పాటు చేసిన అసెంబ్లీ నుండి కిరణ్ కొద్దిగా దూకుడు పెంచాడు. మజ్లిస్ పార్టీ ధిక్కరించినా బెదరకుండా ఘాటుగా సమాధానం ఇచ్చాడు. మంత్రి వర్గంలో తీసుకున్న నిర్ణయాలకు కట్టబడి ఉండకపోతే మంత్రి వర్గం నుండి వెళ్లి పోవచ్చని, లేకుంటే నేనే పంపిస్తానని మంత్రులను పరోక్షంగా హెచ్చరించాడు. ఈ పరిస్థితి అంతా చూసిన వారు కిరణ్ దూకుడు పెంచడానికి కారణం ఏంటా అని ఒక ప్రక్క ఆలోచిస్తుంటే... మరో ప్రక్క ఆయనకు మొదటి నుండి ఉన్న అసమ్మతి వర్గం అధిష్టానానికి ఫిర్యాదు చేసే పనిలో బిజీగా ఉన్నట్లు చెబుతున్నారు.

ముఖ్యంగా తన సొంత జిల్లా నేత అయిన పెద్ది రెడ్డి రామచంద్రారెడ్డి తన బల ప్రదర్శన ద్వారా పదవి నుండి తప్పించేందుకు సిద్ధం అవుతున్నారు. కిరణ్ కి మొదటి నుండి శ్రత్రువుగా ఉన్న డిఎల్ రవీంద్రా రెడ్డి, శంకర్ రావు వంటి వారు డిప్యూటీ సీఎం, బొత్స వంటి వారిని కూడ గట్టి కిరణ్ కి వ్యతిరేకంగా అధిష్టానానికి చెప్పడానికి ఢిల్లీ వెళ్ళేందుకు సిద్దం అవుతున్నట్లు చెబుతున్నారు. అసమ్మతి ఎమ్మెల్యేల అభిప్రాయాలు, మనోగతాన్ని వివరించే బాధ్యత దామోదర రాజనరసింహ తీసుకోనున్నట్లు తెలుస్తోంది. కిరణ్‌కుమార్‌రెడ్డిని తొలగించకపోతే ఒకరి తర్వాత మరొకరు ఎమ్మెల్యేల పదవులకు రాజీనామా చేసే ప్రమాదం ఉందని, ఆయనను తొలగించే అంశంలో చేసే ఆలస్యం పార్టీకి నష్టమని వివరించనున్నారు. అందరూ వెళ్లిపోతే తాము పదవుల్లో కొనసాగినా ఫలితం లేదని చెప్పనున్నారు. ఆ మేరకు ఫిర్యాదుతో కూడిన ఒక సుదీర్ఘ నివేదికను రూపొందించినట్లు కూడా వార్తలు.  ముఖ్యమంత్రిని తొలగించకపోతే తనకు ఉప ముఖ్యమంత్రి పదవి కూడా అవసరం లేదని, తాను కూడా మిగిలిన వారి మాదిరిగానే రాజీనామా చేయకతప్పదని దామోదర స్పష్టం చేయాలని నిర్ణయించుకున్నట్లు సమాచారం. ఇక సీనియర్‌ మంత్రి డీఎల్‌ రవీంద్రారెడ్డి సైతం తన ఎమ్మెల్యే పదవిని త్యాగం చేయాలని సోనియాగాంధీ సమక్షంలోనే చెప్పాలని నిర్ణయించుకున్నారు. మరి వీరందరు మూకుమ్మడి దాడి చేస్తే... కిరణ్ పదవి ఉంటుందో ఊడుతుందో చూడాలి అంటున్నారు రాజకీయ విశ్లేషకులు.