ఢిల్లీలో ఒమిక్రాన్ కొత్త వేరియంట్స్.. ఇతర వాటికన్నా ప్రమాదకరం..!

Posted: 04/22/2022 07:15 PM IST

దేశంలో కొవిడ్ కొత్త​ వేరియంట్​ పుట్టుకొచ్చిందన్న వార్త తీవ్ర భయాందోళనకు గురిచేస్తోంది. ఒమిక్రాన్​కు చెందిన బీఏ.2.12.1 వేరియంట్​.. ఢిల్లీలో వెలుగులోకి వచ్చినట్టు సమాచారం. ఈ వేరియంట్​ వల్లే ఢిల్లీలో కొవిడ్​ కేసులు దారుణంగా పెరుగుతున్నట్టు తెలుస్తోంది. ఇప్పటికే ఉన్న బీఏ.2 కన్నా దీని తీవ్రత ఎక్కువ అని, ప్రజల్లో ఎక్కువగా వ్యాపించే శక్తి దీనికి ఉన్నట్టు తెలుస్తోంది. బీఏ.2 కన్నా ఈ కొత్త వేరియంట్​ డబ్లింగ్​ రేటు 2.5రెట్లు అధికంగా ఉందని వెల్లడించారు.

ఢిల్లీలో గత కొన్ని రోజులుగా 1000కిపైగా కేసులు నమోదవుతున్నాయి. అయితే దాదాపు 8 కొవిడ్​ వేరియంట్లు ఢిల్లీలో ఉన్నట్టు అధికారులు అంచనా వేస్తున్నారు. వీటిల్లో ఒమిక్రాన్​, దాని ఉప వేరియంట్లు కూడా ఉన్నాయి. కాగా ఈ ఎనిమిది వేరియంట్లలో ఒకదాని వల్లే కేసులు భారీ మొత్తంలో పెరుగుతున్నట్టు భావిస్తున్నారు. అందువల్ల దానిని కనుగొనే పనిలోపడ్డారు."ఢిల్లీలో కొత్త వేరియంట్​ బయటకొచ్చినట్టు అనిపిస్తోంది. రోగుల నమూనాలను సీక్వెన్సింగ్​ చేశాము, త్వరలో దీనిపై స్పష్టత లభిస్తుంది," అని ఐఎల్​బీఎస్​ డైరక్టర్​ డా. ఎస్​కే సారిన్​ మీడియాకు వెల్లడించారు.

ఈ పరిణామాల మధ్య కొవిడ్​ నాలుగో వేవ్​ భయాలు ప్రజల్లో మొదలయ్యాయి. కొత్త వేరియంట్లు రాకపోతే నాలుగో వేవ్​ వచ్చే అవకాశం లేదని నిపుణులు ఇప్పటికే స్పష్టం చేశారు. కానీ ఈ పరిస్థితుల్లో ఢిల్లీ వైద్యుల మాటలు సర్వత్రా ఆందోళన కలిగిస్తున్నాయి. కొత్త వేరియంట్​ భయాల మధ్య దేశంలో కరోనా కేసులు భారీస్థాయిలో పెరుగుతుండటం ఆందోళన కలిగిస్తోంది. కొత్తగా 2,451మందికి వైరస్​ సోకింది. క్రితం రోజుతో పోల్చుకుంటే ఇది ఎక్కువ. కొవిడ్​కు 54మంది బలయ్యారు. రోజువారీ పాజిటివిటీ రేటు 05.శాతంగా ఉంది.