నడిసంద్రంలో కార్గోనౌకలో అగ్నిప్రమాదం.. వందల కోట్ల లగ్జరీ కార్లు బూడిద..

Posted: 02/18/2022 09:52 PM IST

Felicity ace burning ship drifts in atlantic with lamborghinis porsches audis aboard

ది ఫెలిసిటీ ఏస్ అనే భారీ రవాణా నౌక అగ్ని ప్రమాదానికి గురైంది. పనామాకు చెందిన ఈ నౌకలో అత్యంత విలాసవంతమైన, ఖరీదైన కార్లను ఇతర దేశాలకు తరలించేందుకు వస్తుండగా ప్రమాదం సంభవించింది. దీంతో లగ్జరీ కార్లన్నీ సముద్రంలో అగ్నిప్రమాదం దాటికి కాలిబూడిదయ్యాయి. అగ్నిప్రమాదం సంభవించడంతో నౌకలోని సిబ్బంది అంతా తమ ప్రాణాలను అరచేతిలో పట్టుకుని సముద్రంలోకి దూకారు. ఈ ఓడలో లాంబోర్ఘిని, పోర్షే, ఆడి, ఫోక్స్ వాగన్ వంటి అంతర్జాతీయ దిగ్గజ కంపెనీల కార్లు ఉన్నాయి. ఈ ఓడ అట్లాంటిక్ మహాసముద్రంలో అజోరెస్ దీవుల వద్దకు వచ్చేసరికి అగ్నిప్రమాదానికి గురైంది.

సమీపంలోనే ఉన్న పోర్చుగీస్ నేవీ, ఎయిర్ ఫోర్స్ సిబ్బంది ఈ నౌకకు సంబంధించిన సమాచారాన్ని అందుకుని వెంటనే సహాయక చర్యలు చేపట్టారు. ది ఫెలిసిటీ ఏస్ ఓడలోని 22 మంది సిబ్బందిని సురక్షితంగా తరలించారు. అజోరెస్ దీవుల్లోని ఓ హోటల్ లో వారికి ఆశ్రయం ఏర్పాటు చేశారు. అయితే, కోట్లాది రూపాయల ఖరీదైన కార్లతో కూడిన ఆ ఓడ ఇప్పుడు నడిసముద్రంలో కొట్టుకుపోతోంది. ఆ నౌకలో ఇప్పుడు ఒక్కరు కూడా లేరు. కాగా, ఈ ఓడలో ఒక్క ఫోక్స్ వాగన్ కంపెనీకి చెందినవే 3,965 కార్లు ఉన్నాయట. దాంతో జర్మనీలోని ఆ సంస్థ యాజమాన్యం తీవ్ర ఆందోళనకు గురవుతోంది.

ఈ కార్గో ఓడ ప్రపంచవ్యాప్తంగా పలు రేవు పట్టణాలకు కార్లను చేర్చాల్సి ఉంది. లగ్జరీ కార్ల తయారీకి పెట్టిందిపేరైన పోర్షే సంస్థ కూడా ఈ పరిణామం పట్ల దిగ్భ్రాంతి వ్యక్తం చేసింది. పోర్షే కంపెనీ కార్లు ఈ ఓడలో 1,100 ఉండడమే అందుకు కారణం. 2019లో గ్రాండే అమెరికా అనే నౌక కూడా ఇలాగే 2 వేల లగ్జరీ కార్లతో వెళుతూ సముద్రంలో మునిగిపోయింది. కాగా, ది ఫెలిసిటీ ఏస్ నౌక యజమాని ఈ ప్రమాదంపై వెంటనే అప్రమత్తమయ్యారు. మరో నౌక సాయంతో తమ నౌకను సురక్షితంగా తీరానికి చేర్చే ప్రక్రియకు శ్రీకారం చుట్టారు.