పెళ్లి పార్టీలో మద్యం కోసం గొడవ.. పెళ్లికోడుకు హత్య

Posted: 12/17/2020 12:22 PM IST

మద్యం సేవించే అలవాటు వుందా..? వుంటే ఆ అబ్బాయిలను నిర్మోఖమాటంగానే అమ్మాయిలు కాదంటున్నారు. మరీ ముఖ్యంగా ఉత్తర భారతంలో మాత్రం మద్యం అలవాటు లేని అబ్బాయిలే కావాలని అమ్మాయితు తెగేసి చెబుతున్నారు. ఇది పట్టణ, నగర ప్రాంతాలకు మాత్రమే కాదు గ్రామీణ ప్రాంతాలకు కూడా పాకింది. మద్యం విషయాన్ని దాచిపెట్టిన అబ్బాయిలు విషయంలో అమ్మాయిలు మరో అడుగు ముందుకేసీ ఏకంగా పెళ్లిపీటల మీద కూడా వరుడ్ని వద్దని.. వారితో పెళ్లికి ససేమిరా అంటూ తెగించి చెబుతున్నారు. మద్యం సేవించిన మనిషి.. తన పంచేంద్రియాలపై సృహ కోల్పోతాడని.. పశువులా ప్రవర్తిస్తాడని వారి నమ్మకం.

వారి నమ్మకాలను సరిగ్గా అలాంటి ఘటనే మరింత బలాన్ని చేకూర్చుతోంది. తన పెళ్లిలో రోజున స్నేహితులు మద్యం కావాలని డిమాండ్ చేయడంతో వారికి రహస్యంగా మద్యాన్ని తెప్పించి పార్టీ ఇచ్చాడు పెళ్లికొడుకు. అదే అతను చేసిన పెద్ద తప్పైంది. అంతేకాదు పెళ్లైన తరువాత చిన్ననాటి స్నేహితులను కలసి వద్దామని అనుకుని వారి వద్దకు వెళ్లడం వరుడు చేసిన మరింత పెద్ద తప్పు. ఆ తప్పే అతడ్ని తిరిగి రాని లోకాలకు తరలివెళ్లేలా చేసింది. చాలినంత మద్యం తెప్పించలేదన్న ఆగ్రహంతో వరుడిపై కత్తితో దాడి చేసి చంపిన ఘటన యూపీలో జరిగింది. పోలీసులు వెల్లడించిన మరిన్ని వివరాల ప్రకారం పాలిముకిల్ పూర్ కు చెందిన బబ్లూకు సోమవారం రాత్రి వివాహం జరుగగా, ఆపై స్నేహితుల కోసం ప్రత్యేకంగా విందును ఏర్పాటు చేశాడు.

వారంతా విందులో ఉండగా, పలకరించి రావాలని వెళ్లాడు. అప్పటికే పూటుగా తాగివున్న మిత్రబృందం మరింత మద్యం కావాలని అడిగారు. తాగినంత వరకూ చాలని, ఇంకా ఎక్కువగా తాగవద్దని బబ్లూ కోరడంతో వివాదం మొదలైంది. దాంతో విచక్షణ కోల్పోయిన స్నేహితులు బబ్లూపై కత్తితో దాడి చేశారు. ఈ ఘటనలో బబ్లూ తీవ్రంగా గాయపడగా, హుటాహుటిన ఆసుపత్రికి తరలించారు. అప్పటికే అతను మరణించాడని వైద్యులు స్పష్టం చేశారు. విషయం తెలుసుకున్న పోలీసులు, కేసును నమోదు చేసి, ప్రధాన నిందితుడిగా భావిస్తున్న రామ్ ఖిలాడ్ అనే వ్యక్తిని అదుపులోకి తీసుకున్నారు. పరారీలో ఉన్న మరో ఐదుగురు ఫ్రెండ్స్ కోసం గాలిస్తున్నట్టు తెలిపారు.