పాన్ షాపులోకి దూసుకెళ్లిన కారు.. మియాపూర్లో బీభత్సం

Posted: 02/19/2020 10:35 AM IST

4 injured as speeding car ramps into panshop at miyapur

హైదరాబాద్ నగరంలోని భరత్ నగర్ రైల్వే ఫ్లైఓవర్ బ్రడ్జిపై ప్రమాదం జరిగి 24 గంటలకు గడచియో లేదో.. మరో కారు ప్రమాదం ఘటన నగరంలోని మియాపూర్ ప్రాంతంలో సంభవించింది. కారు నడుపుతున్న వ్యక్తులు ఎంతో అప్రమత్తంగా వ్యవహరించాల్సి వున్నా.. నిర్లక్ష్యంగా వ్యవహరించడం అదిచాలదన్నట్లు పీకల వరకు మద్యం సేవించి వాహనాలు నడుపుతున్నారు. దీంతో రోడ్డుపై ఎంతో అప్రమత్తంగా వెళ్తున్న సగటు ప్రయాణికుల ప్రాణాలపైకి తీసుకువస్తున్నారు.

తాజాగా మియాపూర్ ప్రాంతంలో ఇలాంటి ఘటనే చోటుచేసుకుంది. పీకల వరకు మధ్యం సేవించిన ఓ కారు డ్రైవర్ బీభత్సం సృష్టించాడు. వేగంగా వెళ్తూ అదుపుతప్పి పలు వాహనాలను ఢీకొట్టాడు. అదే వేగంతో ముందుకు వెళ్తూ రోడ్డు పక్కన ఉన్న పాన్ షాపులోకి దూసుకెళ్లాడు. ఈ ఘటనలో పలువురు వాహనదారులు గాయపడ్డారు. వెంటనే వారిని సమీపంలోని ఆసుపత్రికి తరలించారు. ఈ ఘటనతో వాహనదారులు బెంబేలెత్తిపోయారు.

సమాచారం అందుకున్న పోలీసులు ఘటనా స్థలానికి చేరుకుని కారును షాపు నుంచి బయటకు తీశారు. కేసు నమోదు చేసుకుని డ్రైవర్ ను అదుపులోకి తీసుకుని దర్యాప్తు చేస్తున్నారు. పోలీసులు సాయంకాలం మాత్రమే డ్రంక్ అండ్ డ్రైవ్ చెక్ పెట్టడంతో.. అది కొన్ని ప్రాంతాల్లో రాత్రిళ్ల వరకు కొనసాగుతుండటం కూడా తెలిసిన కొందరు రాత్రితెల్లవార్లూ మద్యం సేవిస్తూ.. తెల్లవారుజామున తిరిగి ఇళ్లకు చేరుతున్నారు. ఈ సమయాల్లో రోడ్డుపై ట్రాఫిక్ ఎక్కువగా వున్నా పట్టించుకోకుండా నిర్లక్ష్యంగా వ్యవహరించడంతో ప్రమాదాలు జరుగుతున్నాయని స్థానికులు పేర్కోంటున్నారు.