ఆ జస్టిస్ ను డిస్మిస్ చేయండి: ప్రెసిడెంట్ కు సీజే లేఖ

Posted: 01/31/2018 11:32 AM IST

దేశ సర్వోన్నత న్యాయస్థానం సుప్రీంకోర్టు ప్రధాన న్యాయమూర్తి వ్యవహరిస్తున్న తీరు.. ప్రజాస్వామ్యానికి గొడ్డలిపెట్టుగా మారిందని అత్యున్నత న్యాయస్థానికి చెందిన సీనియర్ న్యాయమూర్తులు తొలిసారిగా ఏకంగా మీడియా ముందుకు వచ్చి అభిప్రాయాలను వ్యక్తం చేసిన ఘటనను మర్చిపోకముందే.. అదే తరహాలో భారత ప్రధాన న్యాయమూర్తి జస్టిస్ దీపక్ మిశ్రా కూడా ఓ న్యాయమూర్తిపై వేటు వేయాలని కొరుతూ రాష్ట్రపతి రామ్ నాథ్ కోవింద్ ను అభ్యర్థిస్తూ లేఖ రాయడం న్యాయవ్యవస్థలో సంచలనంగా మారింది.

దేశ ప్రధాన న్యాయమూర్తి ఓ జస్టిస్ విషయంలో ఇలా వ్యవహరించడం కూడా అత్యంత అరుదు. కానీ గౌరవమైన న్యాయమూర్తి పదవిలో కొనసాగుతూ అక్రమాలకు పాల్పడిన జస్టిస్ లపై ఇలాంటి చర్యలు తీసుకోవడంలో తప్పుమాత్రం లేదన్న వాదనలు కూడా తెరపైకి వస్తున్నాయి. మెడికల్ అడ్మిషన్ల స్కాంకు తెరతీసిన అలహాబాద్ హైకోర్టు జడ్జి ఎస్ఎన్ శుక్లాపై వేటు వేయాలని సీజేఐ.. రాష్ట్రపతి కోవింద్ కు లేఖ రాశారు.

వివరాల్లోకి వెళ్తే, ఉత్తరప్రదేశ్ లోని మెడికల్ కాలేజీల్లో అడ్మిషన్లకు సంబంధించి భారీ స్కాం చోటు చేసుకుంది. కొన్ని మెడికల్ కాలేజీలపై బ్యాన్ ఉన్న సమయంలో కూడా విద్యార్థులను చేర్చుకోవడానికి శుక్లా అవకాశం కల్పించారు. ఈ నేపథ్యంలో, జస్టిస్ ఎస్ఎన్ శుక్లా అవకతవకలకు పాల్పడ్డారంటూ ఆరోపణలు వచ్చాయి.

దీంతో, ముగ్గురు జడ్జిలతో కూడా ఓ కమిటీ శుక్లాపై విచారణ జరిపింది. ఈ సందర్భంగా శుక్లా ముడుపులు తీసుకున్నట్టు తేలింది. ఈ నేపథ్యంలో, శుక్లాను తొలగించాలంటూ జడ్జిల ప్యానెల్ సుప్రీంకోర్టు చీఫ్ జస్టిస్ కు రెకమెండ్ చేసింది. దీంతో, శుక్లాపై వేటు వేయాలంటూ రాష్ట్రపతికి సీజేఐ లేఖ రాశారు. హైకోర్టు జడ్జిలను తొలగించాలంటే పార్లమెంటులో ఓటింగ్ జరగాల్సి ఉంటుంది.