సిరి చందన ఎపిసోడ్ సుఖాంతం

Posted: 10/11/2017 10:32 AM IST

హౌస్‌ సర్జన్‌ సిరిచందన కిడ్నాప్‌ ఎపిసోడ్ కు ఎట్టకేలకు తెరపడింది. సిరిచందనను భర్త నవీన్ కుమార్ కు పోలీసులు అప్పగించటంతో కథ సుఖాంతమైంది. ఈ కేసులో ఆరుగురిని అదుపులోకి తీసుకున్నట్లు పోలీసులు వెల్లడించారు. పెద్దలకు ఇష్టం లేకుడా ప్రేమించిన వ్యక్తిని ఆమె కులాంతర వివాహం చేసుకుంది.

పోలీసుల సమక్షంలో ఈ పంచాయితీ ఎంతకు తెగకపోవటం.. పైగా తాను భర్తే వద్దే ఉంటానని ఆమె చెప్పటం పేరెంట్స్ కు తీవ్ర ఆగ్రహం తెప్పించింది. ఈ నేపథ్యంలో సోమవారం మధ్యాహ్నాం సిరి చందన, ఆమె భర్త.. అతని సోదరిపై దాడి చేసి సిరిని కిడ్నాప్ చేయించారు. ఈ ఘటన రాష్ట్ర వ్యాప్తంగా కలకం రేపింది.

అసలేం జరిగింది..

చిత్తూరు జిల్లా చంద్రగిరిలోని ప్రభుత్వ రూరల్‌ హెల్త్‌ సెంటర్‌ హౌస్‌ సర్జన్‌ సిరిచందన, తిరుపతికి చెందిన నవీన్‌ కుమార్‌ రెండేళ్లుగా ప్రేమించుకుంటున్నారు. వీరి వివాహానికి పెద్దలు అంగీకరించకపోవడంతో గత ఆగస్టు 16న కులాంతర వివాహం చేసుకున్నారు. అప్పటి నుంచి వారికి బెదిరింపులు ఆరంభమయ్యాయి. దీంతో వారిద్దరూ ఎస్పీని ఆశ్రయించారు. ఈ నేపథ్యంలో పోలీసులు రెండు సార్లు కౌన్సిలింగ్ ఇచ్చారు. అయినప్పటికీ తీరు మార్చుకోని సిరిచందన తల్లిదండ్రులు సోమవారం మధ్యాహ్నం 1.30 గంటల సమయంలో సిరిచందనను కిడ్నాప్ చేయించారు.

విధులు నిర్వహించి ఇంటికి వెళ్తున్న నవీన్‌ కుమార్‌, అతని సోదరి రేవతి, భార్య సిరిచందనను ఆమె తల్లిదండ్రులు తమ వర్గం సాయంతో దాడి చేశారు. తొండవాడ సమీపంలో అడ్డగించి, కళ్లలో కారం చల్లి దాడి చేశారు. స్థానికులు కల్పించుని అడ్డగించటంతో కేవలం సిరిచందనను తీసుకుని వెళ్లిపోయారు. దీంతో నవీన్ పోలీసులను ఆశ్రయించారు.

సిరి చందన తల్లిదండ్రులు రాజభూపాల్ రెడ్డి, పార్వతమ్మలపై అట్రాసిటీ, కిడ్నాప్ కేసులు నమోదు చేసిన పోలీసులు.. ఎట్టకేలకు సిరిచందనను గుర్తించి భర్తకు అప్పగించారు.