ప్లీజ్ కన్నా! మనీ కావాలి.. ఇస్తావా?

Posted: 07/25/2017 10:09 AM IST

ముక్కు మొహం తెలీని వాళ్లతో సవాసాలు చేస్తున్న క్రమంలో దారుణాలు జరుగుతున్నా వాటిని గుణపాఠాలుగా తీసుకోలేకపోతుంది నేటి యువత. కళ్ల ముందు జరిగే మోసాలు చూస్తూ అప్రమత్తంగా ఉండలేకపోతున్నారు. ఇక్కడ అలాంటి ఘటనే ఒకటి జరిగింది. అందమైన‘ఫేస్‌బుక్ ప్రేయసి’అంతే అందమైన స్టోరీని బాయ్‌ఫ్రెండ్‌కు వినిపించింది. కరిగిపోయి చివరకు బకరా అయిపోయాడు ఆ యువకుడు. విజయవాడ పరిధిలో జరిగిన ఘటన వివరాల్లోకి వెళ్లితే...

రిటైర్డ్ రైల్వే ఉద్యోగి కుమారుడు అయిన నందు (17) ఫేస్ బుక్ లో ఓ అమ్మాయితో పరిచయం ఏర్పరుచుకున్నాడు. మెల్లిగా ఆ పరిచయం ఛాటింగ్, ఆపై టేస్టులు కలవటంతో మెల్లిగా ప్రేమ వైపు మళ్లింది. కొన్నాళ్ల తర్వాత యువకుడు ప్రపోజ్ చేయగా, యువతి ఒప్పుకుంది. ఫేస్ బుక్ లో ఎప్పటికప్పుడు తన ఫోటోలు అప్ లోడ్ చేస్తూ యువతి అతని రెచ్చగొట్టసాగింది. కొన్ని రోజుల తర్వాత తనకు అత్యవసరంగా డబ్బులు అవసరమని పెద్ద కథే చెప్పి నమ్మించింది. ఏం చేయాలో పాలుపోని కుర్రాడు తన తండ్రి బ్యాంకు ఖాతా నుంచి ఏకంగా రూ.14 లక్షలు ఆమెకు ట్రాన్స్ ఫర్ చేశాడు.

ఇటీవలె రిటైర్ట్ అయిన తండ్రి ఖాతా నుంచి రూ.20వేలు, రూ.40 వేలు చొప్పున 34 ట్రాన్సాక్షన్స్ ద్వారా ఈ మొత్తం సొమ్మును ఆమెకు చేరవేశాడు. తర్వాత యువతి నుంచి ఎలాంటి స్పందన లేకపోవటంతో తాను మోసపోయిన విషయం గుర్తించి పేరెంట్స్ కు చెప్పి ఆపై పోలీసులకు ఆశ్రయించాడు. కేసు నమోదు చేసుకున్న పోలీసులు, యువకుడు ట్రాన్స్‌ఫర్ చేసిన అకౌంట్ కోల్‌కతా కు చెందిందిగా కనిపెట్టి, ఐపీ అడ్రస్ తో ఆ ప్రేయసిని పట్టుకునే యత్నంలో ఉన్నారు.