నినాదాలు చేస్తూ దారుణంగా నరికేశారు

Posted: 05/29/2017 07:55 AM IST

కమ్యూనిస్ట్ పాలిత రాష్ట్రం కేరళలో దారుణం చోటు చేసుకుంది. గోవధ పై కేంద్రం చట్టాలను కఠినతరం చేస్తున్న సమయంలో.. అది రాష్ట్రాల హక్కులను ఉల్లంఘించటమేనని విపక్షాలు విమర్శిస్తున్నాయి. ఈ క్రమంలో శనివారం కేరళ కాంగ్రెస్ నేతలు దారుణానికి పాల్పడ్డారు. ఓ ఎద్దును నడిరోడ్డు మీదే దారుణంగా నరికి చంపి ఆ వీడియోను సోషల్ మీడియాలో అప్ లోడ్ చేసి నిరసన వ్యక్తం చేశారు.

కన్నూర్ యూత్ కాంగ్రెస్ లీడర్ రిజిల్ మక్కుట్టి నేతృత్వంలో గుర్తు తెలియని కొందరు వ్యక్తులు ఈ ఘోరానికి పాల్పడ్డట్లు సమాచారం. రోడ్డు మీద నినాదాలు చేస్తూ ఒక్క సారిగా ఎద్దును తెగనరికేశారు. ఆపై దానిని వండే అక్కడే భోజనాలు కానిచ్చారు. దీనిపై జంతు ప్రేమికులు తీవ్ర స్థాయిలో మండిపడుతున్నారు. ‘‘ అది కిరాతకం. రోడ్డు మధ్యలో జనాలు అంతా చూస్తుండగా, పైగా అందులో చిన్న పిల్లలు కూడా ఉన్నారు. ఓ జంతువును నరికి చంపేశారు. ఓ మూగజీవి ప్రాణాలను హరించటమే కాదు.. పబ్లిక్ న్యూసెన్స్ చేశారంటూ’’ ఓ ఎన్జీవో సంస్థ ఫిర్యాదు చేసింది. దీంతో కేసు నమోదు చేసినట్లు కన్నూర్ పోలీస్ చీఫ్ శివ కుమార్ తెలిపాడు.

గోవధ ను కఠినతరం చేస్తూ చేస్తున్న చట్టాలపై దేశ వ్యాప్తంగా ప్రతిపక్షాలు నిరసన వ్యక్తం అవుతున్న విషయం తెలిసిందే. బీజేపీ పాలిత రాష్ట్రాలు ఈ నిబంధనలు కొనసాగిస్తుండగా, కేరళ లాంటి రాష్ట్రాలు ప్రజా వ్యతిరేక తీర్మానాలను ఆమోదించటం లేదు. కేంద్రం నిర్ణయాన్ని నిరసిస్తూ... గోవధ, గొడ్డు మాంసం అమ్మకాలపై చట్టాలు చేసుకునే పూర్తి స్వేచ్ఛ రాష్ట్ర ప్రభుత్వాలకు ఉన్నాయంటూ ముఖ్యమంత్రి పినరయి విజయన్ ప్రధాని మోదీకి లేఖ కూడా రాశాడు. మరోవైపు కాంగ్రెస్ యువ విభాగం చేసిన ఈ పనిని ఖండిస్తున్నట్లు రాహుల్ తన ట్విట్టర్ లో పేర్కొన్నాడు.