ITEMVIDEOS:ఆ ఫన్నీ వీడియోతో ఉద్యోగం పొయింది

Posted: 04/10/2017 03:39 PM IST

తన భర్త మరణం వార్తను గుండె నిబ్బరంతో చదివి ప్రపంచానికి తెలియజేసిన ఛత్తీస్ గఢ్ ఐబీసీ 24 న్యూస్ ఛానెల్ గురుప్రీత్ కౌర్ ఉదంతం తెలిసిందే. దు:ఖాన్ని దిగమింగుకుని వృత్తి ధర్మంను పాటించి ఆపై తన భర్త శవం దగ్గరికి బయలుదేరిన ఆమెపై పలువురు ప్రశంసలు కురిపించారు. అయితే ఈ ఉదంతం వెలుగు చూసిన కొద్ది గంటలకే ఇక్కడ మరో న్యూస్ ప్రజెంటర్ వ్యవహారం చక్కర్లు కొడుతుంది. అయితే మొదటి సందర్భం విషాదం అయితే ఇప్పుడు చెప్పుకోబోయేది కాస్త ఫన్నీయే.

ఆస్ట్రేలియా వార్త సంస్థ ఏబీసీ 24 చానెల్‌కు చెందిన న‌టాషా అనే ఆ యాంక‌ర్ బులిటెన్ ను చదువుతోంది. ఇంతలో మానిటర్ లో వార్త ప్రజెంటేషన్ అవుతుండగా, తాను లైవ్‌లో ఉన్న విష‌యాన్ని మ‌ర‌చిపోయి గోళ్లు గిల్లుకుంటూ కూర్చుంది. ఇంతలో కెమెరా ఆన్ అయింద‌న్న విష‌యాన్ని తెలుసుకొని ఒక్కసారిగా ఉలిక్కిప‌డింది. వెంట‌నే క‌వ‌ర్ చేస్తూ స్పోర్ట్స్ న్యూస్ చూద్దామంటూ బులెటిన్‌ను కొన‌సాగించింది.

న్యూస్ ప్రజెంట‌ర్లు వార్త‌లు చ‌దువుతున్న క్ర‌మంలో విజువ‌ల్స్ వ‌స్తున్న‌ప్పుడు, బ్రేక్ స‌మ‌యంలో కాస్త రిలాక్స్ అవుతార‌న్న విష‌యం తెలిసిందే. ఆ స‌మ‌యంలో ఒక్కోసారి కెమెరా ఆన్ అయింద‌న్న విష‌యం తెలుసుకోకుండా ఇలాంటి బ్లూఫర్ వీడియోలతో నవ్విస్తుంటారు. అయితే అనుకోకుండా జరిగినప్పటికీ విధి నిర్వహణలో అప్రమత్తంగా లేదన్న కారణంతో ఆమెను ఉద్యోగం నుంచి తొలగించింది సదరు ఛానెల్. ఇంతకు ముందు చైనా అధ్యక్షుడి పేరు తప్పుగా ఉచ్ఛరించినందుకు ఓ డీడీ యాంకర్ ను, ఓ చావు వార్త నవ్వుతూ చదివినందుకు ఓ ప్రముఖ న్యూస్ ఛానెల్ తమ రీడర్ ను తొలగించిన ఉదంతాలు ఉన్నాయి.