యువతి హైవోల్టేజ్ కిడ్నాప్ డ్రామా, తుస్స్...

Posted: 01/20/2017 09:25 AM IST

తమ కూతురికి ఏమైపోతుందోనని కంగారు పడిపోయిన ఆ తల్లిదండ్రులకు చివర్లో షాక్ మాములుగా తగల్లేదు. విలాసాల‌కు అల‌వాటు ప‌డిన యువ‌తి డ‌బ్బుల కోసం కిడ్నాప్ డ్రామా ఆడింది. అందుకు ప్రియుడి సహకారం తీసుకుని పేరెంట్స్ కి ముచ్చెమ‌ట‌లు పోయించింది. హైద‌రాబాద్‌లో చోటుచేసుకున్న ఈ ఫేక్ కిడ్నాప్ ఉదంతం వివరాల్లోకి వెళ్లితే...

బేగంబ‌జారుకు చెందిన సదరు యువ‌తి(19) నగర శివారులోని ఓ ఇంజనీరింగ్ కళాశాలలో రెండో సంవత్సరం చ‌దువుతోంది. అదే క‌ళాశాల‌లో చ‌దువుతున్న సీనియర్ యువకుడి‌(20)తో ప్రేమ‌లో ప‌డింది. ఇద్ద‌రూ జ‌ల్సాల‌కు బాగా అల‌వాటు ప‌డ్డారు. యువ‌తికి తల్లిదండ్రులు ఇచ్చే పాకెట్ మ‌నీ ఆ యువతికి స‌రిపోక‌పోవ‌డంతో క‌ష్ట‌తరంగా మారింది. ఇదే విష‌యాన్ని ప్రియుడితో చెప్పి ఆవేద‌న చెందేది. బాగా డ‌బ్బు సంపాదించి విదేశాల‌కు వెళ్లాల‌ని ఉంద‌ంటూ తరచూ ప్రియుడితో చెప్పేది. ఎట్టకేలకు వ్యాపారవేత్త అయిన తన తండ్రి వ‌ద్ద చాలా డ‌బ్బు ఉంద‌ని చెప్పి, కిడ్నాప్ డ్రామాకు ఫ్లాన్ వేసింది.

ఇదిలా ఉండగా ఓరోజు యువ‌తి తల్లిదండ్రులకు సదరు ప్రేమికుడు ఫోన్ చేసి కిడ్నాప్ చేశామని, ప్రాణాల‌తో కావాలంటే రూ.30 ల‌క్ష‌లు ఇవ్వాలి' అంటూ హెచ్చ‌రించాడు. దీంతో భ‌య‌ప‌డిన యువ‌తి కుటుంబ స‌భ్యులు పోలీసుల‌ను ఆశ్ర‌యించ‌గా, అసలు గుట్టు ర‌ట్ట‌యింది. ప్రియురాలి స‌ల‌హాతోనే కిడ్నాప్ డ్రామా ఆడిన‌ట్టు యువకుడు పోలీసులకు తెలపగా, యాక్షన్ డ్రామాగా కొనసాగిన సస్పెన్స్ కు ఎట్టకేలకు తెరపడింది.