కెప్టెన్ గా చివరి మ్యాచ్లో దుమ్మురేపిన ధోని

Posted: 01/10/2017 06:05 PM IST

కెప్టెన్‌గా తన చిట్టచివరి మ్యాచ్లో మహేంద్ర సింగ్‌ ధోనీ దుమ్మురేపాడు. ఇంగ్లండ్‌ లెవెన్‌తో ముంబైలో జరుగుతున్న ప్రాక్టీస్‌ మ్యాచ్‌లో ది బెస్ట్ మ్యాచ్ ఫినిషర్ అన్న బిరుదును సార్థకం చేసుకున్నాడు. మునుపటి ధోనీని గుర్తుకు తెస్తూ బ్యాట్‌తో రెచ్చిపోయాడు. ధోని క్రీజులో వుండి మైదానంలోని నలుదిశలా షాట్లు కోడుతూవుంటే.. ధోని అభిమానులు మాత్రం స్టేడియంలో పెద్దపెట్టున ఈలలు, కేకలు, అరుపులతో హల్ చల్ చేశారు. అమ అభిమాన క్రికెటర్ మళ్లీ ఫామ్ లోకి వచ్చాడని సంతోషంలో మునిగితేలారు.

ఇక మరోవైపు టీమిండియా జాతీయ జట్టులోకి పునరాగమనం కోసం ఎదురుచూస్తున్న డాషింగ్ బ్యాట్స్ మెన్ యువరాజ్ సింగ్ తో పాటు అంబటి రాయుడు కూడా ప్రాక్టీసు మ్యాచ్ లో తమ సత్తాను చాటుకున్నారు. కొంతకాలంగా భారత జట్టులో పునరాగమనం కోసం ఎదురుచూస్తున్న అంబటి రాయుడు శతకం బాది సత్తా చాటుకున్నాడు. ఇంగ్లండ్తో జరుగుతున్న యాభై ఓవర్ల డే అండ్ నైట్ వార్మప్ మ్యాచ్లో రాయుడు శతకం సాధించాడు. అలాగే మూడేళ్ల తర్వాత వన్డే జట్టులోకి వచ్చిన యువరాజ్‌ సింగ్‌ హాఫ్‌ సెంచరీతో రాణించాడు. దీంతో తొలుత బ్యాటింగ్‌కు దిగిన భారత్‌ ఏ జట్టు నిర్ణీత 50 ఓవర్లలో 4 వికెట్ల నష్టానికి 304 పరుగులు చేసింది.

రాయుడు  97 బంతుల్లో11 ఫోర్లు, సిక్సర్ సాయంతో సెంచరీ నమోదు చేశాడు. ఆ తర్వాత రిటైర్డ్‌ హర్ట్‌గా వెనుదిరిగాడు. ఐదో నెంబర్‌లో బ్యాటింగ్‌కు దిగిన మహీ తనదైన శైలిలో ఆడి 40 బంతుల్లో 8 ఫోర్లు, 2 సిక్సర్లతో అజేయంగా 68 పరుగులు చేశాడు.  శిఖర్ ధవన్ (63), యువరాజ్‌ (48 బంతుల్లో 6 ఫోర్లు, 2 సిక్సర్లతో 56) హాఫ్‌ సెంచరీలు చేశారు. రాయుడు నిలకడగా రాణించగా.. ధోనీ, యువీ దూకుడుగా ఆడి అభిమానుల్ని అలరించారు. బెస్ట్‌ మ్యాచ్‌ ఫినిషర్‌గా పేరున్న ధోనీ.. కెప్టెన్సీ నుంచి వైదొలిగిన తర్వాత సత్తాచాటాడు. ఇంగ్లండ్‌ బౌలర్లు జాక్‌ బాల్‌, డేవిడ్‌ విల్లీ రెండేసి వికెట్లు తీశారు.