ITEMVIDEOS: రన్ వే దాటి రోడ్డుపైకి అడ్డంగా దూసుకొచ్చిన విమానం..

Posted: 08/05/2016 02:39 PM IST

దుబాయ్ లో విమానం క్రాష్ ల్యాండింగ్ అయ్యి.. అందులోని ప్రయాణికులు స్వల్ప గాయాలతో సురక్షితంగా బయటపడి.. బతికిపోయాం దేవుడా అంటూ ఇంకా నిట్టూర్పినిడుస్తూన్న ఆ ఘటన మిగిల్చిన భాయానక దృశ్యాలను మరువక ముందే మరో విమాన ప్రమాద ఘటన ఇటలీలో వెలుగుచూసింది. ఓ విమానం రన్ వేను దాటుకుంటూ వచ్చి రోడ్డుపైకి అడ్డంగా దూసుకొచ్చింది. దీంతో అ రోడ్డుపై ప్రయాణిస్తున్న వాహనదారులు భయకంపితులయ్యారు. తమ వాహనాలు ఎక్కడికక్కడ నిలిపేశారు. అయితే, పేలుడులాంటి సంఘటన చోటుచేసుకోకపోవడంతో అధికారులు ఊపిరి పీల్చుకున్నారు.

డీహెచ్ఎల్ సంస్థకు చెందిన బోయింగ్ 737-400 అనే కార్గో విమానం తెల్లవారు జామున ఇటలీలోని లాంబార్డీ ప్రాంతంలోని అంతర్జాతీయ విమానాశ్రయంలో దిగే క్రమంలో రన్ వేను దాటుకుంటూ నియంత్రణ కోల్పోయి రయ్మంటూ రోడ్డెక్కింది. ఈ ప్రమాదం జరగడంతో విమానాశ్రయాన్ని తాత్కాలికంగా కొన్నిగంటలు మూసి వేసి అనంతరం తెరిచారు. ప్రమాదానికి గురైన విమానం ప్యారిస్ నుంచి వచ్చినట్లు అధికారులు చెప్పారు. విమాన సిబ్బందికి ఎలాంటి ప్రమాదం జరగలేదని మీడియా ప్రతినిధులు చెప్పారు.