కేసీఆర్, చంద్రబాబు కలిసి నవ్వుకున్నారు

Posted: 12/30/2015 08:58 AM IST

నవ్వడం ఒక యోగం. నవ్వకపోవడం ఓ రోగం అని తెలుసుకున్నారో ఏమో కానీ తెలుగు రాష్ట్రాల ముఖ్యమంత్రులు మాత్రం నవ్వుకున్నారు. కొన్ని రోజుల క్రితం ఒకరి మీద ఒకరు విమర్శలు చేసుకున్న వీరు ప్రస్తుతం కలివిగా కనిపిస్తున్నారు. అమరావతి శంకుస్థాపనకు కేసీఆర్ వెళ్లడం.. కేసీఆర్ చండీయాగానికి చంద్రబాబు రావడం అలా ఇద్దరు ముఖ్యమంత్రుల మధ్య మంచి సంబందాలు కొనసాగుతున్నాయి. అయితే తాజాగా మరోసారి ఇద్దరు చంద్రులు కలిశారు. కలవడమే కాకుండా మనస్పూర్తిగా నవ్వుకున్నారు. ఇదంతా ఎక్కడ జరిగిందా అనుకుంటున్నారా..? అయితే మొత్తం స్టోరీ చదవండి.

శీతాకాల విడిది కోసం హైదరాబాద్ వచ్చిన రాష్ట్రపతి ప్రణబ్ ముఖర్జీకి గవర్నర్ నరసింహన్ పసందైన విందు ఇచ్చారు. రాజకీయ ప్రముఖులతో కళకళలాడిన రాజ్ భవన్ పలు ఆసక్తికర సంఘటనలకు నెలవైంది. ఈ కార్యక్రమానికి ఇరు రాష్ట్రాల సీఎంలు ముఖ్య అతిదులుగా హాజరుకావడంతో రాజ్ భవన్ సరికొత్త శోభను సంతరించుకుంది. ఇద్దరు ముఖ్యమంత్రులు కలిసే అటు, ఇటు కలియతిరుగుతూ సందడి చేశారు. చిరునవ్వుతో కులాసాగా చాల సేపు మాట్లాడుకున్నారు. ఇద్దరు పక్కకు వెళ్లి పావుగంటపాటు ఏకాంతంగా కబుర్లు చెప్పుకున్నారు. రెండు రాష్ట్రాలకు చెందిన పలు అంశాలపై వారు మాట్లాడుకున్నట్టు సమాచారం. ఈ కార్యక్రమానికి తెలంగాణ సీఎం చంద్రశేఖరరావు సతీసమేతంగా వచ్చారు. ఏపీ ముఖ్యమంత్రి చంద్రబాబు మాత్రం ఒంటరిగానే వచ్చారు. విడివిడిగా వచ్చినా, విందులో మాత్రం కలివిడిగా కనిపించారు.