ITEMVIDEOS: ఛండీయాగంలో అగ్నిప్రమాదానికి కారణం అతడే..?!

Posted: 12/28/2015 11:31 AM IST

The reason behind the fire accident in kcrs chandi yagam

తెలంగాణ ముఖ్యమంత్రి కేసీఆర్ ఎంతో ఘనంగా నిర్వహించిన ఆయుత ఛండీయాగంలో చివరి రోజు చిన్న అపశృతి చోటుచేసుకుంది. యాగశాలలో అనుకోకుండా మంటలు చెలరేగడంలో స్వల్ప అగ్ని ప్రమాదం చోటుచేసుకుంది. అయితే అగ్నిప్రమాదం చాలా చిన్నది కావడంతో అందరూ ఊపిరిపీల్చుకున్నారు. అయితే యాగశాలను చివర్లో పూర్ణాహుతి చెయ్యడం యాగంలో భాగమే అని రుత్వికులు వెల్లడించారు. అయితే యాగం నిర్వహిస్తున్న క్రమంలో విరామం ప్రకటించారు. అలా విరామం ప్రకటించడంతో పండితులు వారి బ్యాగులు సర్దుకొని బయటకు పయనమవుతున్నారు.

ఇదే సమయంలో హోమగుండాల వద్ద మిగిలిన ఆవు నెయ్యిని కొందరు పండితులు ఓ బకెట్‌లో పోసి పక్కనపెట్టారు. ఆగ్నేయం దిక్కున మొదటి హోమగుండం పక్కన ఉన్న బకెట్‌లోని నెయ్యిని అటుగా వెళ్తున్న ఓ వ్యక్తి ఒక్కసారిగా యజ్ఞగుండంలో కుమ్మరిం చేశాడు. దీంతో హోమగుండం నుంచి రెండు మీటర్ల ఎత్తుతో ఒక్కసారిగా మంటలు ఎగిసి రెల్లు గడ్డితో వేసిన పైకప్పుకు అంటుకున్నాయి.

యాగశాల చుట్టూ మూడు ఫైరింజిన్‌లను సిద్ధంగా ఉంచారు. కానీ ప్రమాదం చోటుచేసుకున్నప్పుడు అవి లోనికి రావటానికి వీలుపడలేదు. ఒక ఫైరింజన్ అయినా లోపలి వైపు ఉండి ఉంటే యాగశాలకు అంటుకున్న మంటలను వెంటనే అదుపుచేసే అవకాశం ఉండేది. చూస్తుండగానే మంటలు యాగశాలలోని మిగతా వైపు వ్యాపించాయి. యజుర్వేద యాగశాలలో వేసిన వందల సంఖ్యలో కుర్చీలు కూడా కాలిపోయాయి. అయితే దానికి ఆనుకునే ఉన్న ప్రధాన యాగశాల వైపు మంటలు రాలేదు. ఒక వ్యక్తి నిర్లక్ష్యం యాగశాలలో మంటలకు కారణమైంది. ఫలితంగా 15 నిమిషాల్లో వంద యజ్ఞ గుండాలతో కూడుకున్న యాగశాల దగ్ధమైంది.