క్యా బాత్ హై..! 1940 ధరలతో కస్టమర్లకు అల్పాహారం..!!

Posted: 11/27/2015 11:57 AM IST

ముంబైలోని మతుంగా మద్రాస్ కేఫ్. 1940లో తమ హోటల్ లో వున్న ధరలకే.. కస్టమర్లకు అల్పాహారం, టీ, కాఫీలను అందించింది. అదేంటని సుమారుగా ముప్పాతికేళ్ల ధరలకు ఇప్పుడు సరుకులు ఎలా వస్తాయి.. ఆ ధరలలో ఎలా అల్పాహారం తదితరాలను ఎలా వండి వారిస్తున్నారని అలోచిస్తున్నారా..? ఇలా చేసింది కేవలం ఒక్క రోజున మాత్రమే. అదీ ఎందకంటే.. ఈ కేఫ్ ఇటీవలే 75 సంవత్సరాలను పూర్తి చేసుకుంది. ఈ నేపథ్యంలో తమ కేఫ్‌కు వచ్చే వాళ్లకు ఈ సందర్భం గుర్తుండిపోయేలా చేశారు దాని నిర్వాహకులు.

అప్పటి ధరలను ఎందుకు ప్రామాణికంగా తీసుకున్నారనేగా మీ సందేహం. ఎందుకంటే ఇక్కడి కస్టమర్ల నోటికి తగ్గ రుచితో చేసిన వంటకాలను అందిస్తున్న ఈ హోటల్ ప్రారంభించింది 1940లోనేనట. అందకనే కేఫ్ ప్రారంభమైన సమయంలో తినుబండారాలు ఏ ధరకు అందించారో.. 75 ఏళ్లను పూర్తి చేసుకున్న సందర్భంగా కూడా వాటిని అవే ధరలకు అందించారు. ఉప్మా కేవలం 40 పైసలకు, ఫిల్టర్ కాఫీని పదిహేను పైసలకు అందించారు. ఇవేగాక ఈ మద్రాస్ కేఫ్‌లో దక్షిణాది స్పెషల్స్ అయిన రసం, బటర్ ఇడ్లీ, దోసె, అప్పలం, మైసూర్ పాక్ వంటి వాటిని కూడా 1940 నాటి ధరలకు అందించారు. తమ రెస్టారెంట్‌కు వచ్చిన వారికి పాతధరలతో కొత్త అనుభవాన్ని ఇచ్చారు. అయితే ఈ ఆఫర్ పరిమిత సమయం మాత్రమేనండోయ్..

జి. మనోహర్