ప్రధాని మోడీ తరువాత.. ఆ ఘనత సాధించిన కేజ్రీ

Posted: 11/19/2015 12:43 PM IST

ఆమ్‌ ఆద్మీ పార్టీ వ్యవస్థాపక అధ్యక్షుడు, ఆప్ అగ్రనేత, ఢిల్లీ ముఖ్యమంత్రి అరవింద్ కేజ్రీవాల్ ఇవాళ తెల్లవారు జూమునే మరో ఘనత సాధించారు. ప్రధాన మంత్రి నరేంద్ర మోడీ తరువాత ఆ ఘనత సాధించిన రెండో రాజకీయ నేతగా అరవింద్ కేజ్రీవాల్ అవతరించారు. ఇంతకీ అదేంటని ఆరా తీస్తున్నారా..? మన దేశంలో ట్విటర్ లో అత్యధిక ఫాలోవర్లు కలిగిన రెండో రాజకీయ నాయకుడిగా గుర్తింపు పొందారు. బుధవారం రాత్రికి ట్విటర్ లో ఆయన ఫాలోవర్ల సంఖ్య 60 లక్షలకు చేరింది. ట్విటర్ లో 60 లక్షల మార్క్ ను కేజ్రీవాల్ దాటారని 'ఆప్' సోషల్ మీడియా చీఫ్ అంకిత్ లాల్ తెలిపారు.

ట్విటర్ లో కేజ్రీవాల్ కంటే ప్రధాని నరేంద్ర మోదీ అత్యధిక మంది ఫాలోవర్లతో ముందున్నారు. 1.6 కోట్ల మంది ఆయనను అనుసరిస్తున్నారు. సోషల్ మీడియాను విరివిరివిగా వాడే రాజకీయ నాయకుల్లో వీరిద్దరూ అగ్రస్థానంలో ఉన్నారు. ట్విటర్ లో ఎక్కువ మంది పాలోవర్లు కలిగిన రాజకీయ నాయకుల్లో కాంగ్రెస్ నేత శశి థరూర్ కూడా ఒకరు. ఆయనకు 35 లక్షల మంది ఫాలోవర్లు ఉన్నారు. సెలబ్రిటీల ట్విటర్ జాబితాలో బాలీవుడ్ సీనియర్ నటుడు అమితాబ్ బచ్చన్ 1.7కోట్ల ఫాలోవర్స్‌తో మొదటి స్థానంలో కొనసాగుతున్నారు.

జి. మనోహర్