ఫ్లిప్ కార్ట్ లో కొట్టేసిన ఫోన్లు

Posted: 10/06/2015 11:04 AM IST

దేశంలో ఈ కామర్స్ సైట్ లలో ఎంతో పేరున్న ఈ కామర్స్ వెబ్ సైట్ ఫ్లిప్ కార్ట్. అయితే గత కొంత కాలంగా ఫ్లిప్ కార్ట్ వార్తల్లో నిలుస్తోంది. ఫ్లిప్ కార్ట్ లో అసలు వస్తువులకు బదులుగా రాళ్లు వస్తున్నాయని కూడా వార్తలు వచ్చాయి. అలాగే తాజాగా మరోసారి ఫ్లిప్ కార్ట్ వివాదాల సుడిగుండంలో చిక్కుకుంది. అందుకు గాను ఫ్లిప్ కార్ట్ సిఈఓకు దిల్లీ పోలీసులు నోటీసులు కూడా జారీ చేశారు. కొట్టేసిన సెల్ ఫోన్లను ఫ్లిప్ కార్ట్ తన ఈ కామర్స్ వెబ్ సైట్ ద్వారా అమ్మిందని పోలీసులు ఆధారాలతో సహా నిరూపించారు. దాంతో ప్రస్తుతం ఫ్లిప్ కార్ట్ మోసాలకు తాము కూడా మోసపోయామా అన్న అనుమానాలు చాలా మంది కస్టమర్లలో తలెత్తుతున్నాయి. అసలు ఫ్లిప్ కార్ట్ వద్దకు కొట్టేసిన ఫోన్లు ఎలా వచ్చాయి..? ఎలా మార్కెట్ చెయ్యగలిగారు..? దిల్లీ పోలీసుల నెక్ట్స్ స్టెప్ ఏంటి లాంటి వివరాలు తెలియాలంటే మొత్తం స్టోరీ చదవండి.

దిల్లీ ఎయిర్ పోర్ట్ లో హాంకాంగ్ నుండి వచ్చిన సరుకులో సెల్ ఫోన్లు మాయమయ్యాయి. అయితే అలా మాయమైన ఫోన్ల గురించి అధికారులకు ఫిర్యాదు చేసినా ఎలాంటి ప్రయోజనం లేకుండా పోయింది. కానీ తర్వాత అలా మాయమైన ఫోన్లు ఫ్లిప్ కార్ట్ ఈ కామర్స్ ద్వారా కస్టమర్లకు చేరడం కస్టమ్స్ అధికారులకు షాక్ తినిపించింది. దాంతో రంగంలోకి దిగిన దిల్లీ పోలీసులు అసలు కూపీ లాగడం మొదలుపెట్టారు. దాదాపు 40 లక్షల విలువైన 209 ఫోన్ల వివరాలను దిల్లీ పోలీసులు ట్రేస్ చేశారు. అయితే ఫ్లిప్ కార్ట్ యాజమాన్యం వీటిని ఎలా పొందింది అన్న దాని మీద ఎంక్వైరీ నడుస్తోంది. ఫ్లిప్ కార్ట్ యాజమాన్యానికి నోటీసులు కూడా జారీ చేశారు. మరి అసలు మతలబేంటో త్వరలోనే పోలీసులు గుట్టువిప్పుతారు.