సానియా మీర్జా గ్రేట్ విక్టరీ

Posted: 09/14/2015 08:04 AM IST

సానియా మీర్జా ఖాతాలో మరో గ్రాండ్ స్లామ్ వచ్చి చేరింది. తొలిసారి యుఎస్ ఓపెన్ ఉమెన్స్ డబుల్స్‌లో మార్టినా హింగిస్‌తో కలిసి టైటిల్ సాధించింది. దీంతో సానియా ఇప్పటివరకు ఐదు గ్రాండ్ స్లామ్స్ గెలిచినట్లైంది. భారత ఏస్ టెన్నిస్ స్టార్ సానియా మీర్జా జైత్రయాత్ర కొనసాగుతోంది. యూఎస్ ఉమెన్స్ డబుల్స్ ఫైనల్‌ మ్యాచ్‌లో సానియా... స్విట్జర్లాండ్ ప్లేయర్ మార్టినా హింగిస్ చెలరేగి ఆడటంతో... మ్యాచ్ వన్‌ సైడ్ సాగింది. 6-3, 6-3 తేడాతో వరుస సెట్లలో విజయం సాధించింది. మ్యాచ్ ఏ దశలోనూ డెల్లాక్వా, ష్వెదోవా జోడీ పోటీ ఇవ్వలేకపోయింది.

సానియా ఇప్పటివరకు మూడు మిక్స్‌డ్ డబుల్స్‌లో మూడు గ్రాండ్ స్లామ్‌లు... ఉమెన్స్ డబుల్స్‌లో రెండు గ్రాండ్ స్లామ్స్‌లు గెలుచుకుంది.సానియా కెరీర్‌లో ఈ ఏడాది ది బెస్ట్‌గా కనిపిస్తోంది. ఈ సంవత్సరంలోనే ఆమె రెండు గ్రాండ్‌ స్లామ్‌లు దక్కించుకుంది. ఇటీవలే రాజీవ్ గాంధీ ఖేల్ రత్న అవార్డును అందుకుంది. లియాండర్ పేస్ తర్వాత ఇలాంటి పురస్కారం అందుకున్న రెండో భారతీయ టెన్నిస్ ప్లేయర్ సానియానే. 2009లో మహేష్ భూపతితో కలిసి తొలిసారి ఆస్ట్రేలియా ఓపెన్ టైటిల్ సాధించడం ద్వారా... ఆమె గ్రాండ్ స్లామ్ గెలిచిన తొలి ఇండియన్ ప్లేయర్‌గా రికార్డు సృష్టించింది. సానియా ఇప్పటివరకు 14 మెడల్స్ గెలుచుకుంది. వాటిలో ఆరు బంగారు పతకాలున్నాయి. ఆసియా గేమ్స్, కామన్‌వెల్త్ గేమ్స్, ఆఫ్రో-ఆసియా గేమ్స్‌లో పతకాలు గెలిచింది.