కేసీఆర్ ఆ దెబ్బకు ప్రభుత్వానికి రద్దు చేస్తారు: రేవంత్ రెడ్డి

Posted: 09/10/2015 04:24 PM IST

టీడీపీ అంటే.. తెలంగాణ డెవలప్ మెంట్ పార్టీ అని తెలంగాణ టిడిపి నేత, ఓటుకు నోటు కేసులో కీలక నిందితుడు రేవంత్ రెడ్డి కొత్త అబ్రివేషన్ చెప్పారు. తెలంగాణలో భవిష్యత్ అంతా టీడీపీదే అని ఆయన ధీమా వ్యక్తం చేశారు. తనపై పెట్టిన కేసులను రాజకీయంగానే ఎదుర్కొంటానని రేవంత్ స్పష్టం చేశారు. హైకోర్టు అనుమతితో హైదరాబాద్ కు వచ్చిన రేవంత్ రెడ్డి.. ఎక్స్ ప్రెస్ టీవీకి ఎక్స్ క్లూజివ్ ఇంటర్వ్యూ ఇచ్చారు. భవిష్యత్ కార్యాచరణపై మాట్లాడారు. ఇక టీఆర్ ఎస్ పార్టీపైనా, సీఎం కేసీఆర్ పైనా మరోసారి ఫైర్ అయ్యారు రేవంత్ రెడ్డి. హవాలా కేసులో కొంతమంది టీఆర్ ఎస్ నేతలున్నారంటూ ఆయన ఆరోపించారు. తనకో చట్టం, వారికో చట్టం వర్తించదన్నారు.

కొడుకు, కూతురు, అల్లుడు దెబ్బకు.. కేసీఆర్ ప్రభుత్వాన్ని రద్దు చేస్తారని కేసీఆర్ మీద రేవంత్ రెడ్డి ఎద్దేవా చేశారు. తనకు కేసులు కొత్తవి కాదన్న ఆయన.. తనపై పెట్టిన కేసులన్నీ రాజకీయాంగానే ఎదుర్కొంటానని ఆయన స్పష్టం చేశారు. ఇక పార్టీలో ఎవరిని ఎలా ఉపయోగించుకోవాలన్నది చంద్రబాబుకి బాగా తెలుసు అని రేవంత్ వెల్లడించారు. సుదీర్ఘమైన రాజకీయ అనుభవం ఉన్న చంద్రబాబు ఆధ్వర్యంలో పార్టీ మరింత బలపడుతుందన్నారాయన. తనకు ఏ పదవి ఇవ్వాలి, ఎలా పని చేయించుకోవాలి అన్నది అధినేతకు బాగా తెలుసున్నారు రేవంత్. తెలంగాణలో పార్టీ బలోపేతం చేయడానికి అందరం కలిసి పోరాడాలన్నారు. ఒక్కడి వల్లే సాధ్యం కావడానికి ఇది సినిమా కాదన్నారాయన. 2017లోనే ఎన్నికలు వస్తాయని, టీడీపీ అధికారంలోకి వస్తుందని రేవంత్ రెడ్డి విశ్వాసం వ్యక్తం చేశారు.