ప్రయాణికులతో అగ్నికి అహుతైన బస్సు

Posted: 01/11/2015 01:04 PM IST

పాకిస్థాన్ లో ఆదివారం ఉదయం  ఘోర రోడ్డు ప్రమాదం సంభవించింది. రాంగ్ రూట్ లో ప్రయాణిస్తున్న ఆయిల్ ట్యాంకర్ ఎదురుగా వస్తున్న బస్సు ఢీకొన్నడంతో ప్రమాదం సంభవించింది. ఈ ప్రమాదంలో ఆయిల్ ట్యాంకర్ ను ఢికొనడంతో బస్సులో మంటలు వ్యాపించాయి. దీంతో అందులో ప్రయాణిస్తున్న ప్రయాణికులందరూ సజీవ దహనమయ్యారు. ఇప్పటి వరకు ఈ ఘటనలో కనీసం 57 మంది మృతి చెందినట్లు తెలుస్తోంది.

కరాచీ నుంచి షికాపూర్ కు వెళుతున్నఓ బస్సును సూపర్ హైవేపై అతి వేగంగా వస్తున్నఆయిల్ ట్యాంకర్ ఢీకొట్టడంతో రెండు వాహనాల్లో మంటలు వ్యాపించాయి. ఈ ఘటనలో బస్సు పూర్తిగా అగ్నికి ఆహుతి కావడంతో భారీ సంఖ్య లో ప్రాణ నష్టం వాటిల్లింది. అయితే మృతుల సంఖ్య మరింత పెరగవచ్చునని కారాచీ జిన్హా అస్పత్రి వైద్యులు డాక్టర్ సెమి జమాలీ ఆందోళన వ్యక్తం చేశారు.

తాము 60 మంది కన్నా ఎక్కువగా మృతదేహాలను స్వాధీనం చేసుకున్నామని, అవన్నీ పూర్తిగా కాలిన దశలో వున్నాయని, వారిని గుర్తించే స్థితిలో లేవని చెప్పారు. ఆరుగురు పిల్లల మృతదేహాలు వారి తల్లులకు అతుక్కుని వున్నాయని చెప్పారు. వారందరికీ డీఎప్ ఏ పరీక్షలు నిర్వహించిన తరువాతే.. మృతుల వివరాలు స్పష్టమవుతాయని చెప్పారు.
 
జి. మనోహర్