అతని విశాలహృదయంలో 27 మందికి చోటు!

Posted: 06/17/2014 01:45 PM IST

కృష్ణుడికి అష్ట భార్యలైతే తమిళనాడులోని ఒక రసిక శిఖామణికి 27 మంది ప్రియురాళ్ళు.  అయితే అదంతా ఒకవైపు ప్రేమే- అది ఆడవాళ్ల వైపు నుంచే.  ఈ రసికుడికి ప్రేమా దోమా అనేవి పట్టవు- కానీ, వలవేసేది మాత్రం ఇతనే.  ప్రేమ ముగ్గులోకి ఆడపిల్లలను దించేది ఇతనే- కానీ, ఇతను మాత్రం ప్రేమకు చాలా దూరం.  

అలాగని శృంగారానికి దూరంగా ఏమీ ఉండడు.  తన కోరికా తీర్చుకుంటాడు, వాళ్ళ వీడియోలను సిడిలు గా అమ్ముకుని సొమ్మూ చేసుకుంటాడు.  
సోమవారం ఇతని బండారం ఈ విధంగా బయటపడింది-

బెన్సిఫి అనే 21 సంవత్సరాల యువకుడి ప్రేమలో మధురై జిల్లా లో అనైయూర్ ముడకత్తాన్ రోడ్ కి చెందిన 24 ఏళ్ళ యువతి రెజీనా బోర్లా పడింది.  అతని నివాసానికి పోయి మోసపోయింది.  ఆమె పోలీసులకు ఫిర్యాదు చెయ్యటంతో అసలు విషయమంతా బయటపడింది.  

మాసిలామణిపురం, శ్రీనగర్ లో నివాసముంటున్న బెన్సిఫి ఒంటరిగానే ఉంటున్నాడు.  అతని ఇంటికి అతని స్నేహితులు తప్ప మరెవరూ బంధువులు రారు.  అతని తల్లి బెన్సిఫి కి నెల ఖర్చులకోసం రూ.50000 ఇస్తుంది.  దానితో అతను బైక్ మీద తిరుగుతూ ఆడపిల్లలనే కాకుండా వివాహమైన మహిళలను కూడా బుట్టలో వేసుకోవటం చేసాడు.  ఇప్పటి వరకు ఇతని బారిన 27 మంది ఆడవాళ్ళు పడ్డారని తెలిసింది.

ఇతను ముందు వాళ్ళతో ప్రేమగా నటించి, వాళ్ళకి బాగా నమ్మకం కలిగించి తన నివాసానికి పిలుస్తాడు.  వాళ్ళు అక్కడ ఇతను మత్తు మందు కలిపిచ్చిన పానీయాన్ని సేవించి ఆదమరచి నిద్రపోతారు.  వాళ్ళ నగ్న ఛాయాచిత్రాలను సిడి లోకి ఎక్కించి ఇతను వేరే ప్రాంతాల్లో అమ్ముతుంటాడు.  ఇదే ఇతని వృత్తి అయిపోయింది, అందులో ఇతను బాగా రాటుతేలాడు కూడా.  కాలేజ్ లో చదివే ఆడపిల్లలే కాకుండా మహిళలు సైతం ఇతని మోసానికి బలయ్యారు.  ఇదంతా పోలీసు దర్యాప్తులో తేలిన విషయాలు.  

తన మీద ఏడు సెక్షన్ల కింద కేసు నమోదైన విషయం తెలిసిన బెన్సిఫి మకాం మార్చి సేలం వెళ్ళిపోయాడు.  కానీ పోలీసులు అతన్ని తమకున్న అనుభవంతో ఎంతో సులభంగా పట్టుకున్నారు.  బెన్సిఫి తల్లి హేమమాలిని, ఇతనికి మద్దతుగా పనిచేసే బంధువు రాజాల మీద పోలీసులు కేసులు నమోదుచేసారు.

-శ్రీజ