మోదీ సభలో పవన్ కళ్యాణ్ ప్రత్యేకాకర్షణ

Posted: 04/19/2014 03:31 PM IST

ఈ నెల 22 న ఎన్నికల ప్రచారంలో భాగంగా భారతీయ జనతా పార్టీ నిజాం కళాశాల మైదానంలో నిర్వహిస్తున్న బహిరంగ సభలో ఆ పార్టీ ప్రధానమంత్రి అభ్యర్థి నరేంద్ర మోదీ ముఖ్య అతిథిగా పాల్గొంటున్నారు.  ఆ సభలో పవన్ కళ్యాణ్ ప్రత్యేక ఆకర్షణగా నిలవబోతున్నారు. 

పవర్ స్టార్ గా సినీ అభిమానుల మన్ననలందుకున్న పవన్ కళ్యాణ్ జనసేన పార్టీని స్థాపించి, తాను ప్రకటించినట్లుగానే  తర్వాత ఎన్నికలలో నిలబడటం లేదు, తాను సరైన అభ్యర్థులనుకున్నవాళ్ళకు మద్దతునిస్తున్నారు.  నరేంద్ర మోదీని కలిసి మద్దతు తెలిపిన తర్వాత భాజపా తరఫున ఆయన కర్నాటకలో ఎన్నికల ప్రచారానికి ఆఖరు రోజున బహిరంగ సభలలో పాల్గొన్నారు.

ఈ రోజు భాజపా సీనియర్ నేత బండారు దత్తాత్రేయ పవన్ కళ్యాణ్ తో భేటీలో భారతీయ జనతా పార్టీ తరఫున సికింద్రాబాద్ లో ఎన్నికల ప్రచారానికి మాటిచ్చినట్లుగా సమాచారం.  అయితే మోదీ సభ తర్వాత ప్రచారం విషయంలో వివరంగా కార్యక్రమాన్ని రూపొందించటానికి పవన్ కళ్యాణ్ సిద్ధపడ్డారని దత్తాత్రేయ తెలియజేసారు.

-శ్రీజ