పవన్ కళ్యాణ్ అంతరాత్మ ప్రోద్బలం

Posted: 04/02/2014 09:29 AM IST

మీడియా ఇంటర్వ్యూలో మాట్లాడిని పవన్ కళ్యాణ్, అడిగిన ప్రశ్నలకన్నిటికీ సూటిగా సమాధానం చెప్తూ, మిమ్మల్ని వెనకు నుండి నడిపిస్తున్నదెవరు అని అడిగిన ప్రశ్నకు తన అంతరాత్మే తనని నడిపిస్తోందని అన్నారాయన. 

అంత హడావిడిగా జనసేన పార్టీ పెట్టి తాను ఎన్నికలలో పోటీ చెయ్యనని, తనకి పదవులు అధికారం అవసరం లేదని అన్న పవన్ కళ్యాణ్ ని, నిర్వేదంతో నిరాశలోంచి పుట్టిందా ఈ పార్టీ అని అడిగినదానికి, కాదు కోపంతో రగులుతూ పుట్టింది అన్నారాయన.  సామాన్యమానవుడు కేవలం ఎన్నికలలోనే గుర్తుకొచ్చే ప్రభుత్వం మీద కోపం.  అందుకే నేను ఈ ఎన్నికలకు పోకపోవటం.  నేను స్వతహాగా ఏ పనైనా నెమ్మదిగా చేస్తా.  ఇదీ అంతే.  నేను శక్తి పుంజుకుని సిద్ధంగా ఉన్నప్పుడే రాజకీయాలలోకి దిగుతాను అన్నారు.  

మీరు జనసేన పార్టీ పెట్టటానికి వెనక ఏదో రాజకీయ పార్టీ ఉందని అనుకుంటున్నారు అన్న దానికి, అలాంటిదేమీ లేదు.  కానీ ఏమో మీరంటుంటే అనిపిస్తోంది.  నేను పార్టీ పెట్టటానికి వెనక ఉన్న పార్టీ కాంగ్రెస్ పార్టీయే.  అదే నన్ను జనసేన పార్టీ పెట్టటానికి కారణమైంది ఒక విధంగా అన్నారు.  

దేశాన్ని రాష్ట్రాన్ని సమస్యల నుంచి మోదీ చంద్రబాబు బయటపడేస్తారని అనుకుంటున్నారా అన్న ప్రశ్నకు మోదీ మీద విశ్వాసాన్ని ప్రకటించిన పవన్ కళ్యాణ్ చంద్రబాబు విషయంలో ఆయన చేసిన కొన్ని మంచి పనులున్నా ప్రజలు పూర్తిగా ఆయన్ని నమ్మే పరిస్థితిలో లేరు అని అన్నారు.  ఇక తన మోదీకి మద్దతును ప్రకటించిన విషయంలో, దేశంలో ప్రస్తుతం ఉన్నవి రెండే కూటమిలు- యుపిఏ, ఎన్ డి ఏ, అందులో కాంగ్రెస్ తో వ్యతిరేకత వలన యుపిఏ కి నా మద్దతుండదు కాబట్టి మిగిలింది భాజపా నేతృత్వంలో పనిచేసే ఎన్డియే ఒక్కటే అన్నారు.  

మీకు పవర్ వద్దు, డబ్బు వద్దు అంటే మరి మీకు కావలసిందేమిటి, జనసేన పార్టీ ద్వారా ఆశించేదేమిటి అని అడిగిన ప్రశ్నకు సమాజంలో మార్పు అన్నారు పవన్ కళ్యాణ్.  సామాన్యుల కోసం ప్రభుత్వంతో తలపడటం చేస్తాం.  సామాన్యుల గొంతుగా మారదలచుకున్నా.  అధికారంలో ఉన్నవారిని ప్రజల కోసం ప్రశ్నించదలచుకున్నా అని అన్నారు.  చివరగా, నా గుండె ఎప్పుడూ నిస్పృహలో నిరాదరణలో నిస్సహాయంగా ఉన్నవారికోసమే కొట్టుకుంటుంది అని అన్నారు పవన్ కళ్యాణ్.

-శ్రీజ