ఎమ్మెల్యేలు, ఎంపీల మీద కేసులకు కాలపరిమతి

Posted: 03/10/2014 01:11 PM IST

People s representatives cases to conclude in one year supreme court orders

ఎమ్మెల్యేలు, ఎంపీల మీద కేసుల విచారణను సంవత్సరకాలంలో ముగించాలంటూ సుప్రీం కోర్టు ఈరోజు అన్ని ట్రయల్ కోర్టు లకూ ఆదేశాలను పంపించింది. ఒకవేళ అలా చెయ్యలేని పక్షంలో ట్రయల్ కోర్టులు సుప్రీం కోర్టు ప్రధాన న్యాయమూర్తికి అందుకు వివరణనియ్యవలసివుంటుందని కూడా హెచ్చరించింది సుప్రీం కోర్టు.

ఒక ఎన్జీవో వేసిన పిటిషన్ కు స్పందనగా, ఆర్ పి ఏ సెక్షన్ 8(1), 8(2), 8(3) ల ప్రకారం ప్రజాప్రతినిధుల మీదున్న కేసులను ట్రయల్ కోర్టులు సంవత్సరకాలంలోనే ముగించవలసివుంటుందని ఎపెక్స్ కోర్టు తెలియజేసింది.

జూలై 2013 లో సుప్రీం కోర్టు ప్రజాప్రతినిధులకు ఉన్న న్యాయపరమైన మినహాయింపును రద్దు చేస్తూ ఎన్నికల రాజకీయాల ప్రక్షాళనకు శ్రీకారం చుట్టింది. దానికి కొనసాగింపుగా, ప్రజాప్రతినిధుల మీద కేసులను ఎక్కువ కాలం సాగతీయకుండా కూడా సుప్రీం కోర్టు ఈ ఆదేశం ద్వారా నిలువరించింది.

పైన పేర్కొన్న సెక్షన్లలో ప్రజాప్రతినిధులు జాతీయ పతాకాన్ని అవమానపరచటం, వర్గాల మధ్య విభేదాలను సృష్టించే ప్రయత్న చెయ్యటం, నిత్యావసర వస్తువులను అక్రమంగా నిలవచెయ్యటం లాంటి నేరాలున్నాయి. అయితే సెక్షన్ 8(4)లో నేరం మోపబడ్డ ప్రజాప్రతినిధులు దానిమీద కోర్టులో విచారణ కొనసాగుతున్నంత కాలం తమ పదవిలో కొనసాగవచ్చని ఉంది. అందువలన అది కూడా సాగనివ్వకూడదన్న ఉద్దేశ్యంతో సుప్రీం కోర్టు ఆర్ పి ఏ చట్టాన్ని ప్రజా ప్రయోజనంలో మరింత పటిష్టం చేసింది.

ఇప్పటికే ఈ కేసులో మాజీ బీహార్ ముఖ్యమంత్రి ఆర్ జె డి పార్టీ అధ్యక్షుడు లాలూ ప్రసాద్ యాదవ్, ఇతర ఎంపీలు ఈ చట్టం కింద జైలు శిక్ష అనుభవిస్తున్నారు. మన రాష్ట్రంలో కేసులు పెండింగ్ లో ఉన్నవి ఒక్క వైయస్ ఆర్ కాంగ్రెస్ అధ్యక్షుడు వైయస్ జగన్ మీదనే.

-శ్రీజ