ఈనెల 28 తరువాత తెలంగాణ ?

Posted: 07/19/2013 08:32 AM IST

కాంగ్రెస్ అధిష్టానం పార్టీ తెలంగాణ పై ఈనెల 28 తరువాత అటో ఇటో తేల్చడానికి సిద్ధం అయిందా ? అంటే అవుననే తెలుస్తుంది. మొన్న కోర్ కమిటీ సమావేశం తరువాత తెలంగాణ పై నిర్ణయాన్ని సీడబ్ల్యూసీలో తేలుస్తామని దిగ్విజయ్ సింగ్ చెప్పిన విషయం తెలిసిందే. అయితే ఈ సీడబ్య్లూసీ సమావేశం ఎప్పుడుంటుందోననే సందేహం ఉండేది. కానీ తెలంగాణపై నిర్ణయం తీసుకోవడానికి అత్యున్నత నిర్ణాయక సంస్థ కాంగ్రెసు వర్కింగ్ కమిటీ (సిడబ్ల్యుసి) సమావేశం ఈ నెల 28వ తేదీన జరగనుంది. ఈ నెల 28వ తేదీన అందుబాటులో ఉండాలి సీడబ్ల్యూసీ సభ్యులు 41 మందికి ఢిల్లీలోని ఎఐసిసి కంట్రోల్ రూమ్ నుంచి వారికి వర్తమానం పంపించారు. ఈ సమావేశంలో ప్రత్యేక తెలంగాణపై ఏదో ఒక నిర్ణయం తీసుకునే అవకాశం ఉంది. 28వ తేదీ సాయంత్రం ఆరు గంటలకు సమావేశం జరగనుంది. ఈ సమావేశం తరువాత ఏదో ఒక ఖచ్చితమైన నిర్ణయాన్ని వెల్లడించే అవకాశం ఉందని సమాచారం. ఈనెల కాంగ్రెస్ ఉపాధ్యక్షుడు రాహుల్ గాంధీ అధ్యక్షతన జరిగే ఆహార భద్రత బిల్లు సమావేశంలోనే తెలంగాణ పై నిర్ణయం తీసుకొని, అదే నిర్ణయాన్ని సీడబ్ల్యూసీలో చెబుతారని ఆ తరువాత ప్రకటన చేస్తారని అంటున్నారు. అయితే కొంత మంది తెలంగాణ నాయకులు పంచాయితీలు ఎన్నికల కోసమే ఆడుతున్న డ్రామాగా చెబుతున్నారు.