Posted: 04/04/2013 05:19 PM IST

హైద్రాబాద్ బంజారాహిల్స్ లోని కాంగ్రెస్ అధికార ప్రతినిధి, రాజ్యసభ సభ్యురాలు రేణుకా చౌదరి ఇంటిమీద తెలంగాణా రాష్ట్ర సమితి మహిళా విభాగం సభ్యులు దాడిచేసారు. ఆమెకు వ్యతిరేకంగా నినాదాలు చేస్తూ ఆమె ఇంటి మీదకు కోడిగుడ్లు, రాళ్ళు, చెప్పులు, చీపురు కట్టలను విసిరారు. పోలీసులు రంగప్రవేశం చేసి వారిని అదుపులోకి తీసుకున్నారు.

మొన్న ఢిల్లీలో మీడియా సమావేశంలో మాట్లాడిన రేణుకా చౌదరి తెలంగాణా నేతల గురించి హేళనగా మాట్లాడటమే కాకుండా, ప్రత్యేక తెలంగాణా రాష్ట్ర సాధనకోసం ఆత్మహత్యలు చేసుకున్నవన్నీ నిజమైన ఆత్మహత్యలు కావని, వాళ్ళంతా టి.బి., పోలియో, క్యాన్సర్, గుండె జబ్బుల్లాంటి వ్యాధుల వలన మరణించారని, దాన్ని తెరాసా ఆత్మహత్యలుగా చెప్తోందని అన్నారు. దానికి ముందు ఆత్మహత్యల పాపం కెసిఆర్ దేనని, ఉద్యమమేమో కానీ వసూళ్ళ దుకాణాలు పెట్టారంటూ కెసిఆర్ ని విమర్శించారు.

ఈ వ్యాఖ్యలతో రగిలిపోయిన తెరాస కార్యకర్తలు రేణుకా చౌదరి తనన్న మాటలకు బేషరతుగా క్షమాపణ చెప్పాలని డిమాండ్ చేస్తూ ఆమె ఇంటి ముందు నినాదాలు చేస్తూ ఆందోళన చేసారు.

-శ్రీజ