Posted: 12/28/2012 08:02 PM IST

ప్రత్యేక తెలంగాణపై కేంద్రహోంమంత్రి సుశీల్‌కుమార్ షిండే ఆధ్వర్యంలో నిర్వహించిన అఖిలపక్ష సమావేశంలో కాంగ్రెస్ పార్టీ వైఖరి స్పష్టంగా ఉందని పీసీసీ అధ్యక్షుడు బొత్స సత్యనారాయణ అన్నారు. నెల రోజుల్లో తెలంగాణ సమస్యను పరిష్కరిస్తామని షిండే చేసిన వ్యాఖ్యలపై బొత్స హర్షం వ్యక్తం చేశారు. ఈ సమస్య పరిష్కారం కోసం కేంద్రం చిత్త శుద్ధితో పనిచేస్తోందని అన్నారు. సున్నితమైన తెలంగాణ అంశానికి నెల రోజుల్లో శాశ్వత పరిష్కారం చూపిస్తామన్న షిండే వ్యాఖ్యలను తాను బలంగా నమ్ముతున్నానని అన్నారు. నెల రోజుల్లో పరిష్కారం చూపిస్తామని చెప్పడం బట్టే ఈ అంశంపై ఇటు కాంగ్రెస్ పార్టీ, అటు కేంద్రం ప్రభుత్వం ఎంత చిత్తశుద్ధితో ఉన్నాయో అర్ధమవుతోందని అన్నారు. షిండే వ్యాఖ్యలను విశ్వసించాలని, అపనమ్మనం ప్రదర్శించడం భావ్యం కాదంటూ కేసీఆర్‌ను ఉద్దేశించి బొత్స అన్నారు. కాంగ్రెస్ ఎప్పుడూ మాట మార్చదని, అన్ని ప్రాంతాల ప్రయోజనాలను దృష్టిలో పెట్టుకుని వ్యవహరిస్తుందని ఆయన వ్యాఖ్యానించారు. షిండే ప్రకటనను వేరే ఉద్దేశ్యంతో చూడవద్దని బొత్స విజ్ఞప్తి చేశారు. తెలంగాణ అంశం ఇరు ప్రాంతాల ప్రజల మనోభావాలకు సంబంధించినదని ఆయన చెప్పారు. నెల రోజుల సమయం అన్నది పెద్ద వ్యవధి కాదని ఆయన అన్నారు. అఖిలపక్ష సమావేశంలో కాంగ్రెస్ వైఖరే స్పష్టంగా ఉందని బొత్స వ్యాఖ్యానించారు.