Posted: 11/16/2012 04:16 PM IST

అన్నెంపున్నెం ఎరుగని పసిపాపపై అఘాయిత్యం జరిగి రెండు నెలలు అయినా కేసు నమోదు చేయకపోవడంపై కర్నూలు పోలీసులను హెచ్ఆర్సీని తప్పుబట్టింది. బాలిక తల్లిదండ్రులు రాజకీయ ఒత్తిడికి వల్ల ఫిర్యాదు చేయనంత మాత్రాన నిమ్మకునీరెత్తినట్లు వ్యవహరించడం పై ప్రశ్నించింది. ఆగస్టులో కర్నూలు జిల్లా కౌతవరానికి చెందిన ఓ బాలిక బడికి వెళ్లగా, ఉపాధ్యాయుడే అత్యాచారానికి తెగబడ్డాడు. దీనిపై స్థానికులు తిరగబడడంతో అతన్ని సస్పెండ్ చేశారు. ఈ ఉదంతంపై రెవెన్యూ అధికారులు వైద్యపరీక్షలు చేయించి, బాలికపై అత్యాచారం జరిగిందని నిర్ధారించారు. ఆ మేరకు రిపోర్టులు కూడా తయారు చేశారు. కానీ అవి బయటకు రానీయకుండా ఆ టీచరు, రాజకీయ పలుకుబడి ఉపయోగిస్తున్నాడని గ్రహించిన స్థానిక మహిళా సంఘ నేతలు నేరుగా రాష్ట్ర మానవ హక్కుల కమిషన్‌కు ఫిర్యాదు చేశారు. స్పందించిన కమిషన్ డిసెంబర్ 6 లోగా ఒరిజినల్ మెడికల్ రిపోర్టులు అందజేయాలని కలెక్టరుకు, కౌతవరం ఎమ్మార్వోను ఆదేశించారు. కేసు నమోదు చేసి దర్యాప్తు చేయాలని కర్నూలు ఎస్పీకి ఆదేశాలిచ్చారు.