Posted: 10/18/2012 12:37 PM IST

ప్రముఖ ‘కలర్స్’ టీవీ చానెల్ తన ‘బిగ్ బాస్-6’ కార్యక్రమ ప్రచారానికి జాతీయ గీతాన్ని దుర్వినియోగం చేయడంపై ఢిల్లీ హైకోర్టు ఆగ్రహం వ్యక్తంచేసింది. టీవీ కార్యక్రమాన్ని ప్రచారం చేసుకుని లాభాలు ఆర్జించే ఉద్దేశంతో పలు సినిమా హాళ్లలో జాతీయ గీతాన్ని దుర్వినియోగం చేస్తున్నట్లు ఆరోపణలు వచ్చాయని, దీన్ని పరిశీలించి ఆ చానెల్‌పై చర్యలు తీసుకోవాలని కేంద్ర ప్రభుత్వాన్ని ఆదేశించింది. జాతీయ గీతాన్ని దుర్వినియోగం చేస్తూ దేశ ప్రజల మనోభావాలను దెబ్బతీస్తున్నారంటూ దాఖలైన ఓ పిటిషన్‌పై కోర్టు ఈ ఆదేశాలిచ్చింది. వారంలోగా చర్యలు తీసుకోవాలని గడువు విధించింది. ‘‘జాతీయ గీతాన్ని కలర్స్ చానెల్ దుర్వినియోగం చేస్తోంది. బిగ్ బాస్-6 కార్యక్రమానికి సంబంధించి పలు సినిమా హాళ్లలో సినిమాల మధ్యలో ప్రకటనలు ఇస్తోంది. ఈ సమయంలో ‘ప్రేక్షకులందరూ లేచి నిలబడాలని బిగ్ బాస్ ఆకాంక్షిస్తున్నారు.. ఎందుకంటే ఇప్పుడు జాతీయ గీతాన్ని వినిపించబోతున్నారు’ అంటూ ఆ ప్రకటనల్లో పేర్కొంటున్నారు. ఇది జాతీయ గీతాన్ని అవమానించడమే’’నంటూ అడ్వొకేట్ జీతీందర్ గుప్తా ఈ పిటిషన్ వేశారు.