Posted: 10/12/2012 12:18 PM IST

‘అత్తమీద కోపాన్ని దుత్త మీద చూపినట్టు’ పెళ్లాంమీద కోపంతో అత్తగారి ఊరి ప్రజలకు ముప్పుతిప్పలు పెట్టాడో ప్రబుద్ధుడు. పిల్లనిచ్చిన పాపానికి ఓ ఊరిపై పగబట్టి గ్రామ ప్రజలనే కాదు 108 అంబులెన్స్, అగ్నిమాపక సిబ్బందిని సైతం వదలలేదు. వివరాలలోకి వెళితే... కర్ణాటక రాష్ర్టం గుల్బర్గా సమీపంలోని తడ్కల్‌కు చెందిన మహేశ్ ఆర్‌ఎంపీ డాక్టర్. మూడేళ్ల క్రితం మెదక్ జిల్లా కొండాపూర్ మండలం మునిదేవునిపల్లికి చెందిన మంజులతో వివాహమైంది. పెళ్లయిన నాటినుంచే తీవ్రంగా కొడుతుండడంతో మం జుల పలుమార్లు పుట్టింటికి వచ్చేది. గ్రామపెద్దలు సర్దిచెప్పి మళ్లీ కాపురానికి పంపించేవారు. దీంతో వారిపై కక్ష పెంచుకున్న మహేశ్ కాయిన్ బాక్సుల నుంచి ఫోన్లుచేసి బెదిరించేవాడు. ఈ నేపథ్యంలో రెండు నెలల క్రితం పుట్టింటికి వచ్చిన మంజుల తిరిగి కాపురానికి వెళ్లనంది. దీంతో మహేశ్ మరింత శాడిస్ట్‌గా మారాడు. మునిదేవునిపల్లితో పాటు శివారు గ్రామాల్లో వైద్యసేవలు అవసరమంటూ 108 అంబులెన్స్‌కు ఫోన్లు చేసేవాడు. రెండు నెలల వ్యవధిలో సుమారు వందకు పైగా ఇలాంటి ఫోన్లు చేశాడు. కాగా, వారం క్రితం జహీరాబాద్‌కు వచ్చిన మహేష్ ను జహీరాబాద్ పోలీసులు వలపన్ని పట్టుకుని కొండాపూర్ పోలీసులకు అప్పగించారు.