Posted: 09/05/2012 01:08 PM IST

విచక్షణ మరచి, శ్రీలంకలోని వేలాదిమంది తమిళుల్ని పొట్టనబెట్టుకున్న ఆ దేశాధ్యక్షుడు మహీంద్ర రాజపక్సేను ప్రత్యేక కార్యక్రమం కోసం బీజేపీ ఆహ్వానించడమేంటంటూ రాష్ట్రంలోని వివిధ రాజకీయ పార్టీలు మండిపడ్డాయి. తక్షణం తమ నిర్ణయాన్ని ఉపసంహరించుకోవాలంటూ ఆయా పార్టీలు డిమాండ్ చేశాయి. మధ్యప్రదేశ్‌లోని సాంచిలో నిర్మించ తలపెట్టిన బౌద్ధజ్ఞానమందిరం శంకుస్థాపన కార్యక్రమం 21న జరుగనుంది. ఈ కార్యక్రమానికి శ్రీలంక అధ్యక్షుడు రాజపక్సేను ఆహ్వానించినట్లు బీజేపీ పార్లమెంటరీ నేత సుష్మాస్వరాజ్ పేర్కొన్నారు. ఈ విషయం బయటకు పొక్కగానే రాష్ట్ర వ్యాప్తంగా నిరసనలు వ్యక్తమవుతున్నాయి. కరూర్, దిండుగల్, కోయంబత్తూరులలో సోమవారం ఎండీఎంకే, డీపీఐ, నాం తమిళర్ తదితర పార్టీల కార్యకర్తలు రాస్తారోకో చేపట్టి నిరసన తెలిపారు. నల్లబ్యాడ్జీలు ధరించిరాజపక్సేకు వ్యతిరేకంగా నినాదాలు చేశారు.