Posted: 08/08/2012 08:11 PM IST

వచ్చే సాధారణ ఎన్నికల్లో (2014) బీజేపీయేతర, కాంగ్రెసేతర వ్యక్తి ప్రధానమంత్రి అవుతారని భారతీయ జనతాపార్టీ నాయకుడు ఎల్‌కె అద్వానీ తన బ్లాగ్‌లో చెప్పిన జోస్యాన్ని శివసేన అధిపతి బాల్‌ థాకరే దుయ్యబట్టారు. ‘అద్వానీ చెప్పింది ఎలా ఉందంటే - ఫలితానికి గ్యారంటీ ఇవ్వలేమని మిలిటరీ జనరల్‌ యుద్ధం ముందు చెప్పి, మొత్తం సైన్యం నైతికస్థైర్యాన్ని దెబ్బతీసినట్టు ఉంది. మా మిత్రప క్షం బీజేపీకి అసలేమైంది? అది ఏదైనా అనారోగ్యంతో బాధపడుతోందా? లేక చుట్టుముట్టిన అంతర్గత కలహాలతో బెంబేలెత్తుతోందా?’ అని థాకరే శివసేన పత్రిక ‘సామ్నా’ సంపాదకీయంలో రాశారు.  అద్వానీ వ్యాఖ్యలు నైతిక స్థైర్యాన్ని దెబ్బతీసేవిగా ఉన్నాయి అంటూ, ఆ వ్యాఖ్యలతో డీలా పడవద్దని ఎన్‌డీఏకు సలహా ఇచ్చారు. ‘అద్వానీకి ఏవైనా సందేహాలుంటే ఆయన నా వద్దకు రావచ్చు. నేను ఆయనకు ధైర్యాన్ని, బలాన్ని నూరిపోస్తాను’ అని థాకరే సలహా ఇచ్చారు. పునరుత్తేజంతో ఎన్‌డీఏ ఎన్నికలకు సిద్ధం కావాలని ఆయన ఎన్‌డీఏకు హితవు చెప్పారు. ఎన్‌డీఏ లో ప్రధానమంత్రి అభ్యర్థి ఎవరనే విషయమై బీహార్‌ ముఖ్యమంత్రి నితీష్‌కుమార్‌, గుజరాత్‌ ముఖ్యమంత్రి నరేంద్రమోడీ ఎన్నికల తర్వాత తేల్చుకోవచ్చన్నారు. అద్వానీ తన బ్లాగ్‌లో చెప్పిన విషయాలు బీజేపీని సందిగ్ధంలో పడేశాయన్నారు. ఈసారి ఎన్‌డీఏ వ్యక్తే ప్రధాని కావాలని, ఎన్నికల తర్వాత నిర్ణయం తీసుకోవచ్చని థాకరే చెప్పారు.