Posted: 08/03/2012 03:37 PM IST

ఫేస్‌బుక్ క్రేజు అనుకున్నంత లేదా? అకౌంట్లలో నకిలీవి కూడా ఉన్నాయా? ప్రపంచంలో అతిపెద్ద సోషల్ నెట్‌వర్కింగ్ సైట్‌గా ఖ్యాతి గడించిన ఫేస్‌బుక్ స్వయంగా ఈ విషయాన్ని వెల్లడించింది. ఫేస్‌బుక్‌కు ప్రపంచవ్యాప్తంగా 95.5 కోట్ల మంది యూజర్లు ఉన్నారు. ఇందులోప దాదాపు పదిశాతం అంటే 8.3 కోట్ల అకౌంట్లు నకిలీవి లేదా డూప్లికేట్‌వని అమెరికన్ స్టాక్ మార్కెట్ల రెగ్యులేటర్ సెక్యూరిటీస్ ఎక్స్ఛేంజ్ కమిషన్ ప్రకటించింది. మొత్తం అకౌంట్లలో 4.8 శాతం డూప్లికేట్ అకౌంట్లని, అదనపు అకౌంట్ కింద యూజర్లు వీటిని ఉపయోగిస్తుంటారని తెలిపింది. వీటితోప పాటు నకిలీ అకౌంట్లు కూడా ఉన్నాయని, ప్రత్యేక వ్యాపకం లేదా వ్యాపారం కోసం నకిలీ అకౌంట్లను కొంతమంది సృష్టిస్తుంటారని ఫేస్‌బుక్ సదరు ప్రకటనలో తెలిపింది. వీటిని స్పామ్ అకౌంట్లుగా భావిస్తామని ఈ సంస్థ స్పష్టం చేసింది. జూన్ 30 నాటికి మొత్తం యూజర్లలో నకిలీ అకౌంట్లు 2.4 శాతం ఉన్నాయి. అభివృద్ధి చెందిన దేశాల్లో నకిలీ అకౌంట్ల సంఖ్య తక్కువ కాగా ఇండోనేషియా, టర్కీ వంటి దేశాల్లో ఈ తరహా అకౌంట్లు ఎక్కువగా ఉన్నట్లు ఫేస్‌బుక్ ప్రకటించింది. రెండో త్రైమాసికంలో బ్రెజిల్, ఇండియా, ఇండోనేషియాలలో ఫేస్‌బుక్ ప్రాచుర్యం పెరిగిపోయిందని, మెరుగైన వృద్ధిరేటుకు ఈ మార్కెట్లే కారణమని వివరించింది. మొబైల్స్‌లో ఫేస్‌బుక్ వినియోగం పెరిగిన తర్వాత క్రేజు మరింత పెరిగింది. రోజూ యాక్టివ్‌గా ఉండే యూజర్లు బ్రెజిల్ , అమెరికా, ఇండియాలలో ఎక్కువ.