Posted: 04/24/2012 02:58 PM IST

మీరు ఉన్నత చదువుల కోసం అమెరికా వెళ్ళాలనుకుంటున్నారా? చదువు పేరు చెప్పి అక్కడే స్థిరపడాలనుకునే వారికి కేంద్రం షాక్ ఇవ్వబోతుంది. ఉన్నత చదువుల కోసం అమెరికా వెళ్లే వైద్య విద్యార్థులు విద్యాభ్యాసం తర్వాత భారతదేశానికి తిరిగి వస్తామని బాండ్ ఇవ్వాలని కేంద్ర ప్రభుత్వం స్పష్టం చేసింది. ఈ ఏడాది నుంచి బాండ్ ఇచ్చిన వారినే అలా అమెరికా వెళ్లేందుకు అనుమతి ఇస్తామని కేంద్ర ఆరోగ్యశాఖ మంత్రి గులాం నబీ ఆజాద్ చెప్పారు. గడిచిన మూడేళ్లలో మన దేశం నుంచి ఉన్నత చదువుల కోసం అమెరికా వెళ్లిన మూడు వేల మంది డాక్టర్లు తిరిగి స్వదేశానికి రాలేదని తెలిపారు.

ఈ ఏడాది నుంచి తమ దేశంలో విద్యాభ్యాసం కోసం నమోదు చేసుకునే విద్యార్థులు తప్పనిసరిగా భారత ప్రభుత్వం నుంచి నిరభ్యంతర పత్రం (ఎన్ఓసీ) తీసుకోవాలని అమెరికా ప్రభుత్వం స్పష్టం చేసిందన్నారు. 2012 నుంచి అమెరికాలో ఉన్నత విద్యకు వెళ్లదలచుకున్న వైద్య విద్యార్థులు కచ్చితంగా బాండ్ ఇవ్వాలని, ఇచ్చినా తిరిగి రాకపోతే వారికి అక్కడ ప్రాక్టీసు చేసేందుకు అనుమతి ఇవ్వొద్దని అమెరికా ప్రభుత్వానికి రాస్తామని తెలిపారు. ప్రభుత్వం ప్రతిపాదించిన మూడేళ్ల గ్రామీణ వైద్య కోర్సుకు మెడికల్ కౌన్సిల్ ఆఫ్ ఇండియా (ఎంసీఐ) త్వరలోనే అనుమతి ఇస్తుందన్న ఆశాభావాన్ని గులాం నబీ వ్యక్తం చేశారు. అమెరికాలో స్థిర పడాలనుకునే డాక్టర్ల సంగతి ప్రక్కన పెడితే... ఇలా చట్టం చేస్తే మాత్రం భారత్ లో వైద్యుల కొరత కొంతైనా తీరుతుందని కొందరు అభిప్రాయ పడుతున్నారు.