Posted: 01/07/2012 03:04 PM IST

ఈరోజు జనతా పార్టీ అధ్యక్షుడు సుబ్రహ్మణ్యస్వామి, 2జి కేసులో చిదంబరానికి వ్యతిరేకంగా తనదగ్గరున్న ఆధారాలను సుప్రీం కోర్టులో హాజరుపరచారు.

మూడు సంవత్సరాల క్రితం జనవరి 15 2008 లో హోం మంత్రి చిదంబరం ప్రధాన మంత్రికి రాసిన లేఖ ప్రతిని జనతా పార్టీ అధ్యక్షుడు సుబ్రహ్మణ్యస్వామి చేతికి చిక్కటంతో అనేక వివాదాలకు తెరెత్తింది. సమాచార హక్కు కింద ఆర్థిక మంత్రిత్వ శాఖనుండి లభించిన ఈ లేక ప్రతి బహిర్గతమవటంతో భాజపా కూడా చిదంబరం తక్షణమే పదవి నుంచి వైదొలగాలని పట్టుబట్టింది. ఈ లేఖ బయటకు రావటంలో చిదంబరానికి సన్నిహిత పోటీదారుడు ప్రణబ్ ముఖర్జీ హస్తముందన్న వార్తలు కూడా వినిపించాయి. దానిమీద హడావిడిగా కేంద్ర క్యాబినెట్ మంత్రివర్గ సమావేశాలు జరిగాయి, విషయాన్నంతా ష్ ష్ లతో మరుగున పెట్టే ప్రయత్నాలు జరిగాయి. ప్రధానమంత్రి స్వయంగా జోక్యం చేసుకుని చిదంబరం చాలా మంచివాడని తన అభిప్రాయాన్ని కూడా అందరిమీదా రుద్దారు.

ఏ కారణం చేతనో లేక మిగతా ఒత్తిడి కలిగిస్తున్న విషయాలెన్నో ఉన్న కారణంగానూ భాజపా ఈ విషయంలో మాట్లాడటం లేదు కానీ సుబ్రహ్మణ్యస్వామి మాత్రం పట్టు విడవకుండా సుప్రీం కోర్టు తలుపులు తట్టారు. చిదంబరం ప్రధానికి రాసిన లేఖతోపాటు మరెన్నో పత్రాలను దాఖలు చేసిన సుబ్రహ్మణ్యం పిటిషన్ కు స్పందించిన సుప్రీం కోర్టు, వాదనలకు ఈ నెల 21 తేదీని నిర్ణయించింది.

-శ్రీజ