Posted: 12/13/2011 12:44 PM IST

ముళ్ళ పెరియార్ డ్యాం పగుళ్ళ నుంచి నీళ్లు కాదు నిప్పులు ప్రవహిస్తున్నాయి.  అవి తమిళనాడు, కేరళ మధ్య చిచ్చు పెడుతున్నాయి.  కొత్త డ్యాం ను నిర్మించాలని కేరళ శాసన సభలో తీసుకున్న నిర్ణయం, తదితర ప్రకటనలమీద తమిళనాడులో డిఎంకే మండిపడుతోంది.  డిఎమ్ కే పార్టీ ప్రధాన కార్యదర్శి వైగో కేరళ ప్రభుత్వం మీద నిరసన చూపిస్తూ 13 మార్గాల్లో ఆ రాష్ట్రానికి పోయే బస్సులను 21న దిగ్బంధం చేస్తామని ఇంకా ఆ డ్యామ్ అంశం మీద ప్రసంగిస్తూ సమావేశాలను నిర్వహించటంతో ఆయన మీద పెట్టిన కేసు నిన్న హైకోర్టులో విచారణకు వచ్చింది.  అయితే కేసుని జనవరి 11 కి వాయిదా వెయ్యటంతో అక్కడ విలేకర్లతో మాట్లాడిన వైగో, సుప్రీం కోర్టు ఉత్తర్వునిచ్చినా, డ్యాం ఎత్తును 142 అడుగులకు పెంచటానికి అనుమతినీయకపోవటం చట్టరీత్యా నేరమని, ఇంత ఆందోళన జరుగుతున్నా కేంద్రప్రభుత్వం పట్టించుకోకపోవటం శోచనీయమని, కేరళ ప్రభుత్వం వినని పక్షంలో 21న తప్పకుండా దిగ్బంధం చేస్తామని, అందుకు అన్ని రాజకీయ,  తమిళ సంఘాలు మద్దతునిస్తాయని ఆశిస్తున్నానని అన్నారు. 

మద్రాసు న్యాయవాదులు ఈ విషయంలో డ్యాం ఎత్తు పెంచకపోవటాన్ని నిరసిస్తూ విధులను బహిష్కరించారు.  200 మంది వరకూ కూడిన న్యాయవాదులు ఆందోళన సాగిస్తూ, కేరళ ముఖ్యమంత్రి దిష్టిబొమ్మను దగ్ధం చేసారు.  కేంద్ర ప్రభుత్వం కలుగజేసుకుని పరిష్కరించకపోతే ఈ సమస్య ఇంకా ఉధృతమౌతుందని హెచ్చరించారు.

అయితే, ముళ్ళ పెరియార్ డ్యాంకి కాలం తీరిపోయిందని, వాటికి మరమ్మతులు కాదు, ఎత్తు పెంచటం కాదు ఏకంగా కొత్త డ్యాం కట్టాలని, లేకపోతే అపార నష్టం వాటిల్లుతుందని కేరళ ప్రభుత్వం అభిప్రాయపడుతోంది.

-శ్రీజ