తొలిరాత్రి ఆనందానికి సలహాలు

Posted: 12/26/2014 10:12 AM IST

మానవ జీవితంలో పెళ్లికి ఎంత ప్రాధాన్యత ఉందో.., భార్యాభర్తల అన్యోన్యతలో తొలి రాత్రికి అంతే ప్రాధాన్యత ఉంటుంది. ఫస్ట్ ఇంప్రెషన్ ఈజ్ బెస్ట్ ఇంప్రెషన్ అని చాలామంది సలహాలు ఇస్తుంటారు. ఇది అన్ని విషయాల్లో ఏ మేర పనిచేస్తుందో తెలియదు కానీ.., దాంపత్య జీవితంపై ముద్ర వేస్తుంది. ప్రతి ఒక్కరూ కొత్త ఆశలు, ఆలోచనలతో జీవితాన్ని ప్రారంభిస్తారు. అలాంటి సమయంలో అవతలి వ్యక్తి మనోభావాలను అర్ధం చేసుకుంటూ, వారు కోరుకునే ఆనందాన్ని ఇవ్వటంతో పాటు మనకు కావాల్సిన మధురానుభూతి పొందటం ఎలాగో ఇప్పుడు చూద్దాం. ఈ సలహాలు ఆడ, మగ ఇద్దరికి ఉపయోగపడతాయి.

వైవాహిక జీవితం మొదలు పెట్టాక భార్య, భర్తకు తొలి రాత్రి అనగానే సిగ్గుతో పాటు భయం కూడా ఉంటుంది. వీటి వల్లే చాలా కాపురాల్లో వివాదాలు వస్తున్నాయి. కాబట్టి వీటిని కొద్దిసేపు పక్కనబెట్టాలి. ఆడవారు సిగ్గు విడిచి ఉండలేరు కాబట్టి వారు సిగ్గుపడవచ్చు. కాని మగవారు మాత్రం సిగ్గు, భయం ఏది ఉంచుకున్నా దెబ్బతింటారు. దాంపత్య జీవితం ఇక్కడే మొదలవుతుంది కావున ముందుగా ఒకరినొకరు అర్ధం చేసుకోవాలి. మాటలు కోటలు దాటవచ్చు కానీ.., చేతలు మాత్రం అదుపులో ఉండాలి.

ఆవేశాలకు లోనయితే అనర్ధాలు వస్తాయి. శారీరకంగా, మానసికంగా మొదటి రోజు రాత్రి ఎలాంటి ఆవేశాలకు గురికావద్దు. ఏ మాత్రం ఆవేశపడినా తొలిరాత్రి మధురానుభూతి కాకుండా మర్చిపోవాల్సిన అనుభవంగా మారుతుంది. తొలిరాత్రి అందించే అనుభవాలు బ్రతుకంతా చెరిగిపోని ఆనవాళ్ళుగా ఉంటాయి. ఇది తెలుసుకుని జాగ్రత్తగా సృష్టికార్యం మొదలు పెట్టాలి. ఆడవారికి తెలియని విషయాల పట్ల భయం ఉంటే వాటిని పోగొట్టేందుకు సూచనలు ఇవ్వాలి. తొలిరోజు కాబట్టి పూర్తిగా భయం, సిగ్గు వల్ల సహకరించకపోవచ్చు. అంతమాత్రానికే వారి పట్ల నెగెటివ్ ఫీల్ పెట్టుకోవద్దు.

అదేవిధంగా అమ్మాయిలు కూడా దాంపత్య జీవితంపై ఇతరులు చెప్పే విషయాలతో భయాందోళనలకు గురికావద్దు. కొందరికి వాస్తవంగా ప్రకృతి విరుద్ధ ప్రయోగాలు జరిగి ఉండవచ్చు.. కొందరు మగాళ్లు ఇబ్బంది పెడతారు కూడా. అయితే అందరూ అలాగే చేస్తారు అనుకోవటం తప్పు. జీవిత భాగస్వామిని తొలిరోజే పూర్తిగా అర్ధం చేసుకోలేము, ఆధీనంలోకి తెచ్చుకోలేము. అలాగని అణిగిమణిగి ఉండలేము. మీరేమి కోరుకుంటున్నారో మీకు అనువైన భాష ద్వారా చెప్పండి. ఇబ్బందికర పనులు చేస్తే వద్దని సున్నితంగా తిరస్కరించండి. ఇలా ఇద్దరూ ఒకరిని మరొకరు అర్థం చేసుకుంటే తొలిరాత్రి మర్చిపోలేని అనుభూతిని ఇస్తుంది.