యూఎస్ ఓపెన్ లో సానియా జోడీ పరాజయం

Posted: 09/07/2016 07:34 PM IST

Mirza strycova knocked out of women s doubles

యూఎస్ ఓపెన్ మహిళల డబుల్స్ విభాగంలో సానియా జోడీకి ఎదురుదెబ్బ తగిలింది. సానియా మీర్జా (భారత్)-బార్బరా స్టిక్రోవా (చెక్ రిపబ్లిక్) జోడీ క్వార్టర్స్ లో పరాజయం పాలై వెనుదిరగక తప్పని పరిస్థితి ఎదురైంది. భారత కాలమానం ప్రకారం మంగళవారం అర్ధరాత్రి తర్వాత జరిగిన మ్యాచ్ లో ఫ్రెంచ్ ద్వయం కరోలిన్ గార్సికా-క్రిస్టినా మ్లడెనోవిక్ 7-6, 6-1 తేడాతో సానియా-స్ట్రికోవా జోడీపై గెలుపొందింది.

యూఎస్ ఓపెన్ తొలి మూడు రౌండ్లలో కనీసం ఒక్క సెట్ కూడా కోల్పోని సానియా జోడీ క్వార్టర్స్ లో అనూహ్యంగా సెట్ కూడా నెగ్గకుండా ప్రత్యర్థి జోడీకి మ్యాచ్ కోల్పోయారు. తొలి సెట్లో అద్భుతంగా పోరాడినా సానియా-స్ట్రికోవా రెండో సెట్లో పూర్తిగా తేలిపోయారు. దీంతో యూఎస్ ఓపెన్ మహిళల డబుల్స్ లో టాప్ సీడ్ గా బరిలోకి దిగిన ఫ్రెంచ్ జోడీ కరోలిన్ గార్సికా-క్రిస్టినా మ్లడెనోవిక్ క్వార్టర్స్ లో సానియా జోడీపై నెగ్గి సులువుగా సెమిపైనల్లోకి ప్రవేశించింది.

అంతకుముందు మహిళల టెన్నిస్ డబుల్స్ మూడో రౌండ్లో భాగంగా జరిగిన మ్యాచ్ లో సానియా-స్ట్రైకోవా జోడీ 6-4, 7-5తో నికోల్ గిబ్స్(అమెరికా)-హిబినో(జపాన్) ద్వయంపై విజయం సాధించింది. అయితే సానియా మిర్జాకు ఈ ఏడాది అంతగా కలసి వస్తున్నట్లు లేదు. గత ఏడాది వరుస విజయాలతో విమర్శకుల నోటికి తాళం వేసిన సానియా.. ఈ ఏడాది మాత్రం కాసింత క్లిష్ట సమయాన్ని ఎదుర్కోంటుంది. ఈ టోర్నీలోనే మిక్సిడ్ డబుబల్స్ లో కూడా సానియా జోడి ఇవాన్ డోడిగ్(క్రోయేషియా) తో కలసి అడి పరాజయం పాలైన విషయం తెలిసిందే.

మరోవైపు ఈ టోర్నీలో పాల్గోన్న వారిలో సానియా మాత్రమే క్వార్టర్ ఫైనల్స్ వరకు వెళ్లింది. పురుషుల డబుల్స్లో లియాండర్ పేస్, రోహన్ బోపన్న జంటలు నిష్ర్కమించాయి. లియాండర్ పేస్-ఆండ్రీ బెగ్ మాన్(జర్మనీ) జంట 6-2, 5-7, 4-6 తేడాతో స్టెఫానీ రాబర్ట్(ఫ్రెంచ్)- డుడీ సెలా(ఇజ్రాయిల్) జంట చేతిలో పరాజయం చెందగా, మరో మ్యాచ్ లో బోపన్న- ఫెడిరిక్ నీల్సన్(డెన్మార్క్) ద్వయం 2-6, 6-7(5/7) తేడాతో బ్రయాన్ బేకర్(అమెరికా)- మార్కస్ డేనియల్(న్యూజిలాండ్) చేతిలో ఓటమి చెందింది.